नाशिक : 22 सप्टेंबर 2023 | शरद पवार गटाचे आमदार रोहित पवार यांनी अजित पवार यांच्यावर मोठा आरोप केला. आमदाराला गरिबासाठी महत्वाचं असणारं काम करायचं असतं, तेव्हा मंत्र्यांकडे जावं लागतं. त्यावर सही करायची असेल तर प्रतिज्ञापत्र द्यावं लागेल. हे एक प्रकारे आमदारांना विकत घेण्यासारखं झालं असा आरोप त्यांनी केला होता. त्याला मंत्री छगन भुजबळ यांनी प्रत्युत्तर दिलंय. ‘अजित पवार गटातला एकही माणूस असा नाही, जो ब्लॅकमेल करेल. काहीही आपलं बोलायचं. रोहित पवार आणि सगळ्यांनी मंत्रीमंडळात जायचं या पत्रावर सह्या केल्या आहेत असा गौप्यस्फोट त्यांनी केला. शरद पवार साहेब कायदेशीर लढाई लढणार नाही असे म्हणाले होते. पण, आता कायदेशीर नोटीसा देण्याचे काम सुरु झाले आहे. काय होते ते बघू असे भुजबळ म्हणाले. तर, मुख्यमंत्री बदलणार अशी फक्त चर्चा आहे. ५० लोक मुख्यमंत्रीपदाच्या शर्यतीत आहे. जागा खाली आहे का? असा टोला त्यांनी लगावला.