पुणे | 14 मार्च 2024 : पुणे लोकसभा लढविण्यासाठी इच्छुक असलेल्या वसंत मोरे यांनी मनसेला सोडचिट्टी दिल्यानंतर आज पुन्हा राष्ट्रवादी कॉंग्रेसचे अध्यक्ष शरद पवार यांच्या कार्यालयात जाऊन त्यांची भेट घेतली. त्यामुळे त्यांनी आता राष्ट्रवादीत प्रवेश केला काय ? असा सवाल केला जात होता. वसंत मोरे यांना पत्रकारांनी आज चांगलेच भंडावून सोडले. तात्या आपण शरद पवार गटात प्रवेश करणार का? अशा प्रश्नांची सरबत्ती त्यांच्यावर पत्रकारांनी केली. त्यावर वसंत मोरे यांनी स्पष्टपणे काही उत्तर दिले नाही. आपण पक्ष प्रवेशासाठी नव्हे तर लोकसभा निवडणूकी संदर्भातच फक्त शरद पवार यांना भेटायला आलो असल्याचे त्यांनी सांगितले. विशेष म्हणजे आज आमदार निलेश लंके यांनी देखील शरद पवार यांची भेट घेऊन त्यांच्याशी चर्चा केली. परंतू वसंत मोरे आणि निलेश लंके या दोघांनीही आपली पुढील राजकीय दिशा न सांगता सर्वांना संम्रभावस्थेतच ठेवले.