एसटी महामंडळाच्या कर्मचाऱ्यांच्या संपावर तोडगा काढण्यासाठी मुख्यमंत्री एकनाथ शिंदे यांच्या अध्यक्षतेखाली सह्याद्री अतिथीगृह येथे काल महत्त्वाची बैठक पार पडली. या बैठकीत एसटी कर्मचाऱ्यांच्या काही मागण्या मान्य करण्यात आल्या आहेत. यामध्ये शासनाने एसटी कर्मचाऱ्यांच्या मूळ वेतनात साडे सहा हजारांची वाढ केली आहे. या बैठकीला एसटी कामगार संयुक्त कृती समितीचं शिष्टमंडळ उपस्थित होतं. तसेच भाजप आमदार गोपीचंद पडळकर, आमदार सदाभाऊ खोत, वकील गुणरत्न सदावर्ते, एसटी कष्टकरी जनसंघच्या जयश्री पाटील या देखील बैठकीला उपस्थित होत्या. मुख्यमंत्री एकनाथ शिंदे यांनी एसटी कर्मचाऱ्यांच्या काही मागण्या मान्य केल्यानंतर एसटी कर्मचाऱ्यांमध्ये काहिसा आनंद पाहिला मिळाला. दरम्यान, सरकारने केलेल्या एसटी कर्मचाऱ्यांच्या वेतनवाढीच्या घोषणेनंतर कामगार संघटनेचे कृती समितीचे अध्यक्ष संदीप शिंदे हे माध्यमांशी संवाद साधत होते. त्याचवेळी वकील गुणरत्न सदावर्ते आणि त्यांच्या पत्नीने यावेळी तेथे येऊन मोठ-मोठ्याने घोषणाबाजी केली. बघा व्हिडीओ