बदलापूर येथील शालेय अल्पवयीन मुलींवर शाळेतीलत सफाई कर्मचाऱ्याकडून लैंगिक अत्याचार झाल्याची घटना घडली. काल दिवसभर सुरू असलेल्या बदलापूरातील आंदोलनाचं वार्तांकन करत असताना वामन म्हात्रे यांनी अर्वाच्य भाषा वापरून संवाद साधल्याचा आरोप महिला पत्रकार मोहिनी जाधव यांनी केला आहे. बदलापुरातील ज्या शाळेत घटना घडली त्या ठिकाणी पत्रकार असणाऱ्या मोहिनी जाधव जात होत्या. त्याच रस्त्यात त्यांना वामन म्हात्रे भेटले. बदलापूर शहराचे माजी नगराध्यक्ष असलेले वामन म्हात्रे मोहिनी जाधव यांना पाहून थांबले आणि हे प्रकरण तुम्ही पत्रकारांनी पेटवले असल्याचे बोलू लागले. यावेळी त्यांनी मोहिनी जाधव यांना जसं काही तुझ्यावरच बलात्कार झालाय, अशा बातम्या देत आहेस अशी भाषा वापरली. त्यानंतर त्यांना त्यांचे शब्द खटकले आणि तिने थेट पोलीस स्टेशन गाठले मात्र पोलिसांनी देखील या संदर्भातील तक्रार नोंदवून घेतली नसल्याचे त्यांनी म्हटले. दरम्यान, वामन म्हात्रे यांच्याविरोधात कारवाई करण्यात यावी अशी मागणी जोर धरू लागली आहे, इतकंच काय तर भाजपच्या नेत्या चित्रा वाघ यांनी देखील या महिला पत्रकाराचे समर्थन केले आहे.