भिवंडी लोकसभा मतदारसंघातील लोकसभा निवडणुकीची लढत आरोप प्रत्यारोपामुळे चांगलीच चुरशीची झाल्याचे पाहायला मिळाले. भिवंडी मतदारसंघात भाजप आणि राष्ट्रवादी काँग्रेस शरद पवार पक्ष आमने-सामने आले आहेत. राष्ट्रवादी शरद पवार पक्षाचे उमेदवार सुरेश म्हात्रे (बाळ्या मामा) आणि भाजपाचे उमेदवार कपिल पाटील यांच्यात चुरशीचा सामना रंगला. सुरेश म्हात्रे (बाळ्या मामा) आणि कपिल पाटील या दोघांच्या लढाईत आता कोण सरस ठरणार? भिवंडीत यंदा कमळ फुलणार की तुतारी वाजणार? याची उत्सुकता असताना आलेल्या एक्झिट पोलनुसार कपिल पाटील हे आघाडीवर तर बाळ्या मामा पिछाडीवर असल्याचे समोर आले होते. मात्र निकालाचा कल आज समोर येत असताना सुरेश म्हात्रे (बाळ्या मामा) हे आघाडीवर असल्याचे पाहायला मिळत आहे. भिवंडी येथील बाळ्यामामा म्हात्रे हे २३ हजार ५६४ मतांनी आघाडीवर असल्याचे चित्र सध्या आहे. तर हाती येत असलेल्या कलानुसार, विद्यमान भाजप खासदार आणि मंत्री कपिल पाटील यांना मोठा फटका बसल्याचे दिसून येत आहे.