लोकसभा निवडणुकीचा निकाल उद्या ४ जून रोजी लागणार आहे. या निकालाआधीच अनेक राजकीय विश्लेषक आणि टीव्ही 9 पोलस्ट्रेटचा सर्व्हे समोर आला आहे. टीव्ही 9 पोलस्ट्राटच्या एक्झिट पोलच्या अंदाजानुसार, देशात पुन्हा एकदा नरेंद्र मोदी यांची सत्ता येणार आहे. पंतप्रधान नरेंद्र मोदींची हॅट्रिक होणार असून एनडीएला 337 जागा तर इंडिया आघाडीला 170 जागा मिळणार असल्याचा अंदाज वर्तविण्यात आला आहे. तर राज्यात महाविकास आघाडीला सर्वाधिक जागा मिळणार असल्याचे समोर आले आहे. यावरून राष्ट्रवादीचे नेते एकनाथ खडसे यांनी भाजपला चिंतन करण्याची गरज असल्याचे वक्तव्य केले होते. एकनाथ खडसे यांनी दिलेल्या सल्ल्यावर गिरीश महाजन यांनी प्रतिक्रिया देत खडसेंना चांगलेच फटकारल्याचे पाहायला मिळाले. एकनाथ खडसेंनी आधी सांगावं ते कोणत्या पक्षात आहेत. भाजपवर बोलण्याआधी खडसेंनी त्यांचा पक्ष कोणता हे सांगा आणि मग बोला, असं म्हणत त्यांना गिरीश महाजन यांनी प्रत्युत्तर दिले आहे.