गिरीश बापट ऑक्सिजन सिलेंडरसह व्हिलचेअरवर बसून प्रचाराच्या रणधुमाळीत, बघा व्हिडीओ

पुणे : पुण्यातील कसबा आणि चिंचवडची पोटनिवडणूक अतिशय प्रतिष्ठेची बनल्याचे पाहायला मिळत आहे. कसब्याच्या पोटनिवडणुकीसाठी भाजप खासदार गिरीश बापट हे थेट व्हिलचेअरवर बसून प्रचाराच्या मैदानात उतरले आहेत. गिरीश बापट हे आजारी असून त्यांच्यावर सध्या रुग्णालयात उपचार सुरु आहेत. मात्र असं असताना देखील पक्षासाठी ते आज व्हिलचेअरवर बसून कसबा पोटनिवडणुकीच्या प्रचारासाठी मैदानात उतरले. यावेळी त्यांनी कसबा पोटनिवडणुकीसाठी आज प्रचाराला सुरुवात केली आणि कार्यकर्त्यांना मार्गदर्शन केले. बापट यांनी आपण कसब्याच्या पोटनिवडणुकीतील भाजपचे उमेदवार हेमंत रासणे यांचा प्रचार करणार असल्याचं म्हटलं होतं. कसब्यात नगरसेवक, पदाधिकारी आणि कार्यकर्त्यांच्या मेळाव्यात गिरीश बापट यांनी व्हिलचेअरवर एन्ट्री केली. यावेळी गिरीश बापट यांची प्रकृती प्रचंड ढासळलेली दिसली. त्यांच्या बोटांमध्ये ऑक्सिमीटर होतं. तसेच त्यांच्याजवळ ऑक्सिजनचा सिलेंडरदेखील पाहायला मिळाला.