राज्याचे उपमुख्यमंत्री देवेंद्र फडणवीस यांनी रात्री उशिरा मुख्यमंत्री एकनाथ शिंदे यांची वर्षा या त्यांच्या निवासस्थानी भेट घेतली. रात्री ११ वाजून ४० मिनिटं ते १२ वाजून ५० मिनिटांपर्यंत देवेंद्र फडणवीस आणि एकनाथ शिंदे यांच्यात चर्चा झाल्याची माहिती मिळत आहे. देवेंद्र फडणवीस आणि मुख्यमंत्री एकनाथ शिंदे यांच्यात जवळपास तासभर चर्चा झाली. दोघांमध्ये झालेली ही चर्चा विधानसभा निवडणुकीच्या जागांसंदर्भात असल्याची माहिती मिळत आहे. दरम्यान, गेल्या रविवारीच भारतीय जनता पक्षाकडून विधानसभा निवडणुकीच्या पार्श्वभूमीवर तब्बल ९९ जणांची यादी जाहीर केली. भाजपकडून जाहीर करण्यात आलेल्या ९९ उमेदवारांच्या यादीत कुणाला परत उमेदवारी देण्यात आली तर काहींचा पत्ता कट केल्याचे पाहायला मिळाले. तर भाजपकडून आणखी काही नावं पक्षाकडून निश्चित केल्यानंतर भाजपची दुसरी यादी येण्याची शक्यता आहे. अशातच येत्या दोन दिवसात एकनाथ शिंदे यांच्या शिवसेनेच्या उमेदवारांची यादी जाहीर होण्याचा अंदाजही वर्तविला जात आहे.