विधानसभा निवडणुकीच्या पार्श्वभूमीवर मुंबईमध्ये सध्या भाजप आणि शिवसेना उद्धव बाळासाहेब ठाकरे या दोन पक्षात जबरदस्त बॅनरवॉर रंगताना दिसतंय. एकीकडे राज्याचे उपमुख्यमंत्री देवेंद्र फडणवीस तर दुसरीकडे शिवसेना UBT गटाचे प्रमुख उद्धव ठाकरे यांचे बॅनर मुंबईत झळकवण्यात आलेत. हे बॅनर सध्या मुंबईतील जनतेच्या चर्चेचा विषय ठरत आहेत. मुंबईच्या चौका-चौकात भाजप आणि शिवसेना उद्धव ठाकरे गटाचे मोठमोठे होर्डिंग्ज निवडणुकीला अवघे काही दिवस शिल्लक असताना लावण्यात आले आहे. या बॅनरच्या माध्यमातून केलेल्या कामाचं श्रेय घेण्याची स्पर्धा महायुती आणि शिवसेना ठाकरे गटाकडून सुरू आहे. भाजपकडून महायुती आहे तर गती आहे, महाराष्ट्राची प्रगती आहे असा महायुतीच्या बॅनरवर उल्लेख केल्याचे पाहायला मिळतंय तर तर कोरोनाच्या काळात धारावी मॉडेलने ज्याने जगभर आपला मान वाढवला तो खरा नेता असा उल्लेख शिवसेना उद्धव ठाकरे पक्षाच्या बॅनरवर कऱण्यात आलाय.