राज्यासह देशभरात आज दिवसभर दहीहंडी उत्सव मोठ्या जल्लोषात आणि उत्साहात पार पडत आहे. बड्या राजकीय पक्ष आणि नेत्यांकडून दिमाखदार दहीहंडी उत्सवाचं आयोजन करण्यात आल्याचे पाहायला मिळत आहे. मुंबईकरांनी गोविंदांना प्रोत्साहित करण्यासाठी मोठी गर्दी केल्याचे सकाळपासून दिसतेय. अशातच मुंबईतील बोरिवली पूर्व देवीपाडा मैदानावर आमदार प्रकाश सुर्वे, त्यांचा मुलगा यांच्या तारामती चॅरिटेबल फाउंडेशनच्या माध्यमातून भव्य असा दहीहंडी उत्सवाचे आयोजन करण्यात आले आहे. यंदा गोविंदा पथकांना प्रोत्साहन देण्यासाठी बॉलिवूड अभिनेत्री करिष्मा कपूर, भाग्यश्री पटवर्धन, लावणी सम्राज्ञी गौतमी पाटील यांची उपस्थिती पाहायला मिळत आहे. विशेष म्हणजे दहीहंडी उत्सवाच्या निमित्ताने आज मागाठाणे येथे आमदार प्रकाश सुर्वे यांच्या मतदारसंघात गौतमी पाटील उपस्थित असल्याचे पाहायला मिळाले. यावेळी गौतमी पाटील टीव्ही 9 मराठीशी संवाद साधला. ती म्हणाली की, ‘मी ऑल महाराष्ट्र शो करत असते. मुंबईची गोष्टच वेगळी आहे. लव यू मुंबईकर’ दरवर्षी प्रकाश सुर्वे भव्य स्वरुपात दहीहंडी उत्सवाच आयोजन करत असतात. या उत्सवामध्ये 9 थर लावणाऱ्या गोविंदा पथकाला तब्बल 1 लाख रुपयांचे पारितोषिक देण्यात येणार आहे.