मध्य रेल्वेवरील विविध अभियांत्रिकी आणि देखभालीची कामे करण्यासाठी आज ब्लॉक घेण्यात आला आहे. या ब्लॉकमुळे लोकल सेवेवर परिणाम होण्याची शक्यता आहे. मध्य रेल्वेमार्गावरील ठाणे–कल्याणदरम्यान पाचवी आणि सहावी मार्गिकेवर सकाळी ९ ते दुपारी १ वाजेपर्यंत ब्लॉक घेण्यात येणार आहे. यामुळे लांबपल्ल्याच्या रेल्वेगाड्या जलद मार्गावर वळवण्यात येणार आहेत. त्यामुळे लोकल सेवा विलंबाने धावतील. सकाळी ९.५० वाजताची वसई रोड- दिवा मेमू कोपरपर्यंत चालवण्यात येणार आहे. कोपर आणि दिवा स्थानकांदरम्यान लोकल रद्द करण्यात येणार आहेत. सकाळी ११.४५ वाजताची दिवा-वसई रोड मेमू कोपरवरून चालवण्यात येतील. हार्बर मार्गावरील पनवेल–वाशी स्थानकांदरम्यान अप आणि डाऊन हार्बर मार्गावर सकाळी ११.०५ ते सायंकाळी ०४.०५ पर्यंत ब्लॉक घेण्यात येणार आहे. ब्लॉक कालावधीत सीएसएमटी–पनवेल/बेलापूर अप आणि डाऊन लोकल रद्द करण्यात येणार आहेत. तर पनवेल–ठाणे अप आणि डाऊन लोकल रद्द करण्यात येणार आहेत. ब्लॉक कालावधीत सीएसएमटी–वाशीदरम्यान विशेष लोकल धावतील. ब्लॉक कालावधीत ठाणे–वाशी / नेरुळ स्थानकांदरम्यान ट्रान्सहार्बर लोकल सेवा उपलब्ध असेल. बेलापूर / नेरुळ–उरण स्थानकांदरम्यान पोर्ट मार्गिका उपलब्ध असतील.