खोपोली : जुन्या पुणे-मुंबई महामार्गावर एक खासगी बस दरीत कोसळल्याने भीषण अपघात झाला आहे. ही बस दरीत कोसळल्याने 7 ते 8 जणांचा जागीच मृत्यू झाला असल्याची माहिती मिळतेय. जुन्या पुणे-मुंबई महामार्गावर बोरघाटातील शिंगरोबा मंदिर जवळ पहाटे 4 वाजेच्या सुमारास ही घटना घडली. या घटनेत 20 ते 25 जण जखमी झाले आहेत. यातील 16 लोकांना सुखरूप बाहेर काढण्यात पोलीस, अग्निशमन दल आणि स्थानिक ग्रामस्थांना यश आलं असून अद्याप काही लोकांना बाहेर काढण्याचे प्रयत्न सुरूच आहेत. ही खासगी बस पुण्याहून मुंबईला निघाली होती. चालकाचा बसवरील ताबा सुटल्याने हा अपघात झाल्याची प्राथमिक माहिती असून जुन्या पुणे-मुंबई महामार्गावरील शिंगरोबा मंदिराच्या मागील घाटात बसचा तोल गेला आणि ही बस दरीत कोसळली. बस दरीत कोसळल्याने अचानक बस आदळली आणि बसमधील प्रवाशांनी आरडाओरड सुरू केली.