लोकसभेत मुस्लिम समाजाने मतदान केलं नाही, असं म्हणत ओरड करणारी भाजपा आणि त्याच्यासोबत नव्या हिंदुत्वाने पछाडलेल्या शिंदे सेनेसोबत गेलेले लोकं कुही कुही सुरुवात केली होती की, हिरव्या मतांवर मविआ निवडून आली. आम्ही हिरव्या मतांचा विचार करणार नाही, मुस्लिमांचं लांगुलचालन करणार नाही म्हणाणारे आता आम्हाला शिंदेंना प्रश्न विचारायचा आहे, कुणाच्या लांगुलचालनासाठी बुरखा वाटप करतायत? असा सवाल ठाकरे गटाच्या नेत्या सुषमा अंधारेंनी केलाय. तर यामिनी जाधव बुरखा वाटपाचा कार्यक्रम घेतायत तो कुणाच्या लांगुलचालनासाठी? बुरखा वाटपाचा मोह होतो याचा अर्थ मुस्लिम मतावर डोळा ठेवून तुम्हाला हे सगळं थेरं सुचत आहेत का? असा खोचक सवालही अंधारे यांनी केला. यावर स्वतः यामिनी जाधव यांनी प्रत्युत्तर दिलंय. “गेल्या वर्षभरापासून ही संकल्पना माझ्या डोक्यात आहे. कारण मुस्लिम धर्मातील महिलांना सर्वात जास्त काय प्रिय असेल तर तो बुरखा. हा त्यांचा एक सन्मान आहे. त्या दृष्टीने मी हे वाटप केलेलं आहे. माझ्यावर टीका होत आहे की, लांगूनचालन आम्ही करत आहोत. पण गेल्या अनेक वर्षांपासून मी मुस्लिम धर्मासाठी काम करत आहे. कोरोना काळ सुरु असतानाही आम्ही मुस्लिम धर्मासाठी इफ्तारी पोहोचवली होती. त्यावेळी आमच्यावर टीका का झाली नाही. कारण त्यावेळी आम्ही तिकडे होतो म्हणून का?” असा सवालही यामिनी जाधव यांनी उपस्थित केला.