दुचाकी निर्माता कंपनी रॉयल एनफिल्डने आपल्या बाजारातील काही बाईक्स परत मागविल्या आहेत.कंपनीने नोव्हेंबर 2022 ते मार्च 2023 पर्यंतच्या तयार झालेल्या सर्व बाईक्सना परत मागविण्याचा निर्णय घेतला आहे. कंपनीने घेतलेल्या नियमित चाचणी दरम्यान रियर किंवा साईड रिफ्लेक्टरमध्ये काही त्रूटी आढळल्याने हे पाऊल उचलले आहे. ही त्रूटी दूर करण्याचा प्रयत्न टप्प्या टप्प्याने करण्यात येणार आहे.ज्याची सुरुवात दक्षिण कोरिया, अमेरिका आणि कॅनडा पासून होणार आहे. त्यानंतर भारत, ब्राझील, लॅटीन अमेरिका, युरोप आणि युकेमधील बाईक्स परत मागविण्यात येणार आहेत.
दुचाकी निर्माता कंपनी रॉयल एनफिल्डच्या मते काही मोटर सायकलमध्ये रिफ्लेक्टर आवश्यक परावर्तक प्रदर्शन मानकांना पूर्ण करीत नसल्याचे उघडकीस आले आहे. त्यामुळे बाईक्स चालविताना परिणाम होण्याचा धोका आहे. रिफलेक्टर योग्य प्रकारे प्रकाश परावर्तित करीत नसल्याचे उघडकीस आले आहे.अंधारात त्यामुळे इतरांना दुचाकी नीट दिसण्यास अडचण येऊ शकते. त्यामुळे अपघाताला निमंत्रण मिळू शकते त्यामुळे हे रियर आणि साईड रिफलेक्टर बदलण्यासाठी टप्प्या टप्प्याने या बाईक्स परत मागविल्या आहेत. रिकॉल्स केलेल्या बाईक्स संख्या कंपनीने गुप्त ठेवलेली आहे. परंतू ही संख्या काही हजारात असू शकते असे म्हटले जात आहे.
या रिकॉल संदर्भात दुचाकी निर्माता कंपनी रॉयल एनफिल्डने म्हटले आहे की उच्चतम सुरक्षा मानके कायम रहाण्यासाठी हे आवश्यक पाऊल उचलण्यात आले आहे, जरी या समस्येच्या व्यापक स्वरुपात तक्रारी आलेल्या नसल्या तरी हे रिफलेक्टर बदलण्यात येणार आहेत. या साठी केवळ पंधरा मिनिटांचा अवधी लागणार आहे. त्यामुळे कंपनीची सर्व्हीस टीम ग्राहकांशी संपर्क करणार आहे. या समस्येला दुरुस्त करण्यासाठी कंपनी जागतिक बाजारातील सर्व ग्राहकांच्या बाईक्सचे रिफलेक्टर मोफत बदलून देणार आहे.