नवी दिल्ली | 3 नोव्हेंबर 2023 : चीनमध्ये पुन्हा कोरोनाने डोकेवर काढले. त्यानंतर झिरो कोविड नियमांचा चीनला मोठा फटका बसला. जगभरातील कंपन्यांनी चीनमध्ये काही दशकांपासून तंबू टाकला होता. त्या कंपन्यांनी आता उत्पादनासाठी इतर देशांचा रस्ता धरला आहे. या कंपन्यांनी भारत जवळ केला आहे. जगातील दुसरी सर्वात मोठी अर्थव्यवस्था कोरोनाने कमकुवत झाली आहे. जगातील दुसरी सर्वात मोठी टेक कंपनी ॲपलने भारतात एंट्री केली. आयफोन 15 भारतात तयार करण्यात आला. त्यानंतर आता इतर कंपन्यांनी चीन सोडून भारताला पसंती दिली आहे. चीनला चूक उमगली. पण तोपर्यंत अनेक कंपन्यांनी गाशा गुंडाळला आहे. आयफोनचे नवीन मॉडल लवकरच भारतात तयार होणार आहे.
हे मॉडल भारतात तयार होणार
ॲपलने पुन्हा एकदी चीनला आस्मान दाखवले. ॲपल कंपनी आयफोन 17 चे उत्पादन भारतात करणार आहे. त्यामुळे या आयफोन 17 वर मेड इन चायना नाही तर मेड इन इंडिया अशी मोहर असेल. हा चीनसाठी मोठा झटका मानण्यात येतो. चीनमध्ये स्वतंत्र आयफोन सिटी आहे. याठिकाणी फॉक्सकॉन मोठ्या प्रमाणात उत्पादन करते. या नवीन घोषणेमुळे या आयफोन सिटीच्या भवितव्यावर प्रश्नचिन्ह निर्माण झाले आहे. प्रकल्प असेच बाहेर गेले तर या प्रकल्पातील कर्मचारी, कामगारांवर बेरोजगारीचे संकट कोसळू शकते.
2025 मध्ये आयफोन 17
गेल्या काही दिवसांपासून भारतात मोबाईल उत्पादनाला सुगीचे दिवस आले आहे. त्यामागे केंद्र सरकारने घेतलेली भूमिका मानण्यात येते. अनेक धोरणं बदलविण्यात आली आहे. परदेशी कंपन्यांसाठी पायघड्या टाकल्या जात आहे. PLI Scheme ने हा बदल घडवला आहे. ॲपलचा आयफोन भारतात असेम्बल होतो. ॲपलचे विश्लेषक ची कू यांनी एक रिपोर्ट तयार केला आहे. त्यात 2025 मध्ये आयफोन 17 लाँच होईल, तो पूर्णपणे मेड इन इंडिया असेल असा दावा करण्यात आला आहे. त्यामुळे पहिल्यांदा ॲपल चीनबाहेर आयफोनची उत्पादन करणार असल्याचे समोर आले आहे.
केव्हा होणार उत्पादन सुरु
भारतात आयफोन 17 चे उत्पादन 2024 मधील दुसऱ्या तिमाहीत सुरु होण्याची शक्यता वर्तविण्यात येत आहे. याचा थेट अर्थ चीनला झटका बसणार आहे. ची कू च्या रिपोर्टनुसार, 2024 पर्यंत भारतात आयफोन उत्पादन 25 टक्के होईल. तर जागतिक बाजारात भारताचा आयफोनमधील वाटा 12 ते 14 टक्क्यांनी वाढेल. त्यामुळे देशाच्या अर्थव्यवस्थेला मोठा हातभार लागेल.