Recession News : मंदीचा फेरा आला की काय? Ola मधील कर्मचा-यांच्या नोकरीवर गदा, पगार वाढीचं तर नावच काढू नका
Ola Laying off : एकीकडे Zomato, Blinkit आणि Swiggy सारख्या कंपन्या त्वरीत डिलिव्हरीसाठी प्रयत्न करत असताना, Ola Dash ची सेवा बंद होणार आहे.
देशातील अर्थव्यवस्था अजूनही रुळावर आली नाही. अर्थव्यवस्थेसमोर (Indian Economy) अनेक आव्हाने आ वासून उभी आहेत. अमेरिकेत तर मंदीने (American Recession) अनेकांचा रोजगार हिरावला (Deprived of employment) आहे. अनेक तंत्रज्ञांचा रोजगार हिरावला आहे. तेच वारं भारतीय अर्थव्यवस्थेत शिरु पाहतंय. अजून मंदीचा फेरा आला नसला तरी ओला कंपनीच्या धोरणाने भीतीचे वातावरण तयार झाले आहे. अॅपवर आधारीत कॅब सेवा (Cab Service) देणा-या ओला कंपनीने कर्मचा-यांना डच्चू देण्यास सुरुवात केली आहे. अनेक कर्मचा-यांना कंपनीने नारळ हाती दिला आहे. एवढंच नाही तर कंपनीने परफॉर्मेंसवर (Performance Base) आधारीत अप्रॅजलही (Appraisal) टाळले आहे. याचा सरळ अर्थ त्यांना इनक्रिमेंट मिळणार नाही, बढती नाही की पगार वाढ नाही.दोन वर्षांपूर्वी या कंपन्यांनी कोरोना काळातही उत्तम कामगिरी बजावत कर्मचा-यांची नियुक्ती केली होती. आता या कंपन्या कर्मचा-यांच्या मुळावर उठल्या आहेत. यामुळे बाजारात मंदी तर आली नाही ना, अशी चर्चा सुरु आहे.
500 कर्मचा-यांच्या नोकरीवर गदा
IANS या वृत्त संस्थेने सूत्रांच्या माहिती आधारे ही बातमी दिली आहे. त्यानुसार, ओला कंपनी जवळपास 500 कर्मचा-यांच्या हातात नारळ देणार आहे. त्यांना नोकरीवरुन काढून टाकणार आहे. कर्मचा-यांना कमी करण्याच्या हालचालींना वेग आला असून लवकरच ही प्रक्रिया पूर्ण करण्यात येणार आहे. या कंपनीकडे सध्या 1100 कर्मचारी कार्यरत आहेत. कंपनीला निधी जमा करण्यात अडचणी येत आहेत. त्यामुळेच अनेकांच्या नोकरीवर गदा येण्याची भीती आहे.
स्पॉटबँकेकडून (Softbank) कंपनीला फंडिंग केले आहे. फायद्यात राहण्यासाठी कंपनीचा आकार कमी करण्याचे धोरण स्वीकारले आहे. यासोबतच कंपनीने कर्मचा-यांना देण्यात येणारी पगारवाढ, भत्ता, वेतन वाढ संपूर्णतः बंद केले आहे. आजतक या संकेतस्थळाने दिलेल्या माहितीनुसार, कंपनीचे एचआर प्रमुख बालाचंदर एन यांनी कर्मचा-यांसाठी एक संदेश पाठविला आहे. त्यात कंपनी व्यापार पुनर्गठित करत असून त्यासाठी लागणा-या काळानंतर बढती, वेतन आणि अनुषांगिक लाभाबद्दल विचार करण्यात येईल असे त्यांनी स्पष्ट केले आहे.
ओला बंद करणार अनेक व्यवसाय
ओला कंपनीने त्यांचे संपूर्ण लक्ष्य इलेक्ट्रिक व्हेईकल उद्योगावर केंद्रित केले आहे. त्यामुळे त्यांनी त्यांची इतर अनेक व्यवसाय बंद करण्याचा धडाका लावला आहे. गेल्या महिन्यात कंपनीने त्यांची सेंकड कार विक्रीसाठीची कंपनी Ola Cars बंद करण्याची घोषणा केली. गेल्या ऑक्टोबर महिन्यातच ओला ने हा व्यवसाय सुरु केला होता. या व्यवसायातंर्गत 100 शहरांमध्ये 300 केंद्र सुरु करण्याची योजना ही अंधातरीच राहिली. उलट कंपनीने 5 मोठ्या शहरातील विक्री केंद्रे बंद केली आहे.