Mukesh Ambani | मुकेश अंबानी यांची रॉकेट भरारी! तिजोरीत एकाच दिवसात जमा झाले 57,032 कोटी
Mukesh Ambani | रिलायन्सच्या शेअरमध्ये सोमवारी मोठी तेजी दिसून आली. यामुळे समूहाचे चेअरमन मुकेश अंबानी यांची एकूण संपत्ती वाढली. अंबानी सोमवारी सर्वाधिक कमाई करणारे अब्जाधीश ठरले. तर त्यांच्या पाठोपाठ गौतम अदानी यांनी पण मोठी झेप घेतली. ते 100 अब्ज डॉलरच्या उंबरठ्यावर आहेत.
नवी दिल्ली | 30 January 2024 : देशातील सर्वात मौल्यवान कंपनी रिलायन्स इंडस्ट्रीजचे (Reliance Industries) शेअर सोमवारी उसळले. या शेअर्समध्ये 6 टक्क्यांहून अधिकची तेजी दिसून आली. त्यामुळे रिलायन्स इंडस्ट्रीजचे चेअरमन मुकेश अंबानी यांची नेटवर्थ, एकूण संपत्तीत 6.86 अब्ज डॉलरची वाढ झाली. जगातील श्रीमंतांच्या यादीत ते 11 व्या स्थानावर पोहचले. सोमवारी अंबानी सर्वाधिक कमाई करणारे अब्जाधीश ठरले. त्यांची संपत्ती 108 अब्ज डॉलरवर पोहचली. भारत आणि आशियातील सर्वात श्रीमंत व्यक्त अंबानी यांच्या संपत्तीत या वर्षात 11.3 अब्ज डॉलरची तेजी दिसून आली. तर गौतम अदानी हे 100 अब्ज डॉलर क्लबच्या उंबरठ्यावर येऊन ठेपले आहे. सोमवारी त्यांच्या नेटवर्थमध्ये 4.28 अब्ज डॉलरची भर पडली.
कोणाच्या खिशात किती डॉलर
- सर्वात श्रीमंत व्यक्ती एलॉन मस्क यांच्या संपत्तीत 5.49 अब्ज डॉलरची भर पडली. आता त्यांची एकूण संपत्ती 204 अब्ज डॉलर इतकी झाली आहे. पण त्यांच्या संपत्तीत यंदा 25 अब्ज डॉलरची घसरण दिसून आली. तर गेल्या वर्षभरात त्यांनी 92 अब्ज डॉलरची कमाई केली.
- जेफ बेजोस 186 अब्ज डॉलर संपत्तीसह जगातील श्रीमंतांच्या यादीत दुसऱ्या क्रमांकावर पोहचले. फ्रान्सचे बर्नार्ड आरनॉल्ट (183 अब्ज डॉलर) तिसऱ्या, बिल गेट्स (145 अब्ज डॉलर) चौथ्या, मार्क झुकरबर्ग (145 अब्ज डॉलर) पाचव्या स्थानावर आहेत.
- स्टीव्ह बालमर (142 अब्ज डॉलर) सहाव्या क्रमांकावर, लॅरी पेज (137 अब्ज डॉलर) सातव्या, सर्गेई ब्रिन (130 अब्ज डॉलर) आठव्या क्रमांकावर, लॅरी एलिसन (128 अब्ज डॉलर) नवव्या स्थानावर, वॉरेन बफे (128 अब्ज डॉलर) दहाव्या क्रमांकावर आहेत. यंदा कमाईच्या बाबतीत मार्क झुकरबर्ग पहिल्या क्रमांकावर आहेत. त्यांच्या तिजोरीत आतापर्यंत 16.5 अब्ज डॉलर आले आहेत.
गौतम अदानी
तर अदानी समूहाचे चेअरमन गौतम अदानी पण मागे नाहीत. अदानी यांच्या नेटवर्थमध्ये सोमवारी 4.28 अब्ज डॉलरची भर पडली. आता त्यांची संपत्ती 95.9 अब्ज डॉलरवर पोहचली. यंदा त्यांच्या नेटवर्थमध्ये 11.6 अब्ज डॉलरची भर पडली. कमाईच्या बाबतीत मार्क झुकरबर्ग यांच्यानंतर अदानी यांचा क्रमांक लागतो. गेल्यावर्षी अमेरिकन शॉर्ट सेलिंग कंपनी हिंडनबर्ग रिसर्च कंपनीच्या एका रिपोर्टनंतर या समूहात मोठा भूकंप आला होता.