निवडणूक लढविण्याइतके सुद्धा पैसे नाहीत; निर्मला सीतारमण यांची संपत्ती तरी किती?

निर्मला सीतारमण यांची संपत्ती किती?

देशात लोकसभा निवडणुकीचा ज्वर वाढत आहे. विविध टप्प्यात देशभरात निवडणुकीचा रणसंग्राम होईल. पण केंद्रीय अर्थमंत्री निर्मला सीतारमण यांनी लोकसभा निवडणूक न लढविण्याचा निर्णय जाहीर केला आहे. त्यांच्याकडे ही सार्वत्रिक निवडणूक लढविण्यासाठी पुरेसा निधी नसल्याचे कारण त्यांनी दिले आहे. देशाच्या आर्थिक आरोग्याचा लेखाजोखा ठेवणाऱ्या सीतारमण यांच्याकडे किती संपत्ती आहे, हे तुम्हाला माहिती आहे का?

भाजपने दिला होता पर्याय

निवडणूक लढविण्यासाठी पैसा नसल्याचे कारण देत लोकसभा निवडणुकीत उभे न राहण्याचा निर्मला सीतारमण यांचा पवित्रा सर्वांनाच हैराण करणारा आहे. भाजप अध्यक्ष जे.पी. नड्डा यांनी त्यांना आंध्र प्रदेश वा तामिळनाडू येथून निवडणूक लढविण्याचा पर्याय दिला होता. पण या निवडणुकीसाठी आपल्याकडे योग तितका निधी नसल्याचे कारण त्यांनी पुढे केले आणि निवडणूक न लढविण्याचा निर्णय त्यांनी जाहीर केला.

इतक्या संपत्तीच्या धनी

1. 2019 मध्ये निवडणूक आयोगाकडे निर्मला सीतारमण यांनी शपथपत्र दाखल केले होते. त्यात त्यांची एकूण संपत्ती 2 कोटी रुपयांपेक्षा अधिक असल्याचे त्यांनी स्पष्ट केले होते. तर त्यांच्या डोईवर 30 लाख रुपयांपेक्षा अधिकचे कर्ज असल्याचे स्पष्ट केले होते.
2. PMO च्या संकेतस्थळानुसार, 2022 मध्ये केंद्रीय अर्थमंत्र्यांकडे केवळ 7,350 रुपयांची रोख होती. तर सर्व बँकांचे मिळून 35,53,666 रुपयांची ठेव होती. अर्थमंत्र्यांनी पब्लिक प्रोव्हिडंट फंडमध्ये (PPF) 1,59,763 रुपयांची गुंतवणूक केली आहे. तर म्युच्युअल फंडमध्ये त्यांनी 5,80.424 रुपयांची गुंतवणूक केली आहे. पण त्यांच्याकडे कोणतीही विमा पॉलिसी नाही.
3. केंद्रीय अर्थमंत्र्यांच्या संपत्तीच्या विवरणात एक गोष्टीचा खस उल्लेख करावा लागेल, तो म्हणजे त्यांच्या नावे एक पण कार नाही. तर त्यांच्या नावावर एक बजाज चेतक स्कूटर आहे. त्याची किंमत केवळ 28,200 रुपये आहे.
4. 2022 मध्ये त्यांच्याकडे एकूण 18,46,987 रुपयांचे दागदागिने आहेत. यामध्ये जवळपास 315 ग्रॅम सोने आहे. आज या सर्व मौल्यवान धातूची किंमत जवळपास 20 लाख रुपयांच्या घरात आहे. तेलंगणातील हैदराबाद येथे त्यांचे एक आलिशान घर आहे. त्याची किंमत 1,70,51,400 रुपये आहे. याशिवाय त्यांच्याकडे हयातनगरमध्ये एक अकृषक जमीन पण आहे. त्याची किंमत 17,08,800 रुपये आहे.

इतके आहे डोईवर कर्ज

• निर्मला सीतारमण यांच्या डोईवर 5,44,822 रुपयांचे गृहकर्ज
• तर 2,53,055 रुपयांचा ओव्हरड्राफ्ट
• 18,93,989 रुपयांचे मॉर्गेज कर्ज