आर्थिक विवंचनेतून मायलेकात सतत वाद, अखेर दारुच्या नशेत मुलाने आईचाच केला घात
रवी पुमणी हा उच्चशिक्षित असून एका खाजगी कंपनीत नोकरी करतो. त्याचा महिन्याचा सर्व पगार कर्जाचे हफ्ते फेडण्यात आणि घरभाडे भरण्यात जात होता. यामुळे आर्थिक चणचणीतून आई आणि मुलामध्ये नेहमी वाद व्हायचा.
कल्याण : कल्याणमध्ये दोन दिवसांपूर्वी एका महिलेचा मृतदेह पंख्याला लटकलेल्या अवस्थेत आढळला होता. या प्रकरणी पोलिसांना महिलेच्या मृत्यूबाबत उलगडा करण्यास यश आले आहे. महिलेने आत्महत्या (Suicide) केली नसून हत्या (Murder) झाल्याचे निष्पन्न झाले आहे. धक्कादायक बाब म्हणजे पोटच्या मुलानेच घरगुती वादातून स्वतःच्या आईला संपवले. याप्रकरणी कोळसेवाडी पोलिसांनी आरोपी मुलाला बेड्या (Arrest) ठोकल्या आहेत. रवी पुमणी असे आरोपी मुलाचे नाव आहे. तर सरोजा पुमणी असे मयत आईचे नाव आहे.
आर्थिक चणचणीतून मायलेकात रोज भांडणं व्हायची
रवी पुमणी हा उच्चशिक्षित असून एका खाजगी कंपनीत नोकरी करतो. त्याचा महिन्याचा सर्व पगार कर्जाचे हफ्ते फेडण्यात आणि घरभाडे भरण्यात जात होता. यामुळे आर्थिक चणचणीतून आई आणि मुलामध्ये नेहमी वाद व्हायचा. तसेच रवीला दारुचेही व्यसन होते.
नेहमीप्रमाणे मायलेकात दोन दिवसापूर्वी वाद झाला. याच वादातून रवीने नायलॉनच्या दोरीने आईचा गळा आवळला. ही हत्या नसून आत्महत्या असल्याचे भासवण्यासाठी मृतदेह पंख्याला लटकवला. यानंतर रवीने स्वतःलाही जखमा करुन घेतल्या.
महिलेची मुलगी घरी आल्यानंतर सर्व प्रकार उघड
आईच्या हत्येनंतर रवीने बहिणीला फोन करुन आईचा आणि आपला वाद झाल्याचे सांगितले. बहीण घरी आली असता आई पंख्याला लटकलेली आढळली. तिने कोळसेवाडी पोलिसांना याबाबत माहिती दिली. पोलिसांनी घटनास्थळी धाव घेत मृतदेह ताब्याच घेत शवविच्छेदनासाठी पाठवला. तसेच जखमी रवीला उपचारासाठी शासकीय रुग्णालयात दाखल केले.
शवविच्छेदन अहवालात हत्येचा खुलासा
शवविच्छेदन अहवाल आल्यानंतर सरोजा यांनी आत्महत्या केली नसून त्यांची हत्या झाल्याचे निष्पन्न झाले. यानंतर कोळसेवाडी पोलिसांनी आरोपी मुलाला अटक केली. त्याची कसून चौकशी केली असता त्याने हत्येची कबुली दिली. रवीला कल्याण कोर्टात हजर करण्यात येणार आहे.
