लिफ्ट देण्याच्या बहाण्याने गाडीवर बसवायचा, मग अश्लील चाळे करायचा !

लिफ्ट देण्याच्या बहाण्याने महिलांशी अश्लील वर्तन करणारा अटक

नागपूर : लिफ्ट देण्याच्या बहाण्याने विद्यार्थिनी आणि महिलांशी अश्लील चाळे करणाऱ्या 65 वर्षीय ज्येष्ठ नागरिकाला नागपूरच्या बेलतरोडी पोलिसांनी सापळा रचून अटक केली. पांडुरंग दांडेकर असे या आरोपीचे नाव आहे. दांडेकर पाटबंधारे विभागातील निवृत्त कर्मचारी आहे. तांत्रिक तपासाच्या आधारे पोलिसांनी सापळा रचून आरोपीला ताब्यात घेतले. जेष्ठ नागरिकाच्या या कृत्यामुळे सर्वत्र संताप व्यक्त होत आहे. त्याच्या विकृत मानसिकतेमुळे परिसरातील महिला आणि विद्यार्थिनींमध्ये असुरक्षिततेचा वातावरण निर्माण झालं होतं. याआधी देखील त्याने चार ते पाच महिलांसोबत असे अश्लील चाळे केले आहेत. मात्र महिला किंवा विद्यार्थिनी पुढे आल्या नाहीत. पोलिसांनी आता आवाहन केलं आहे की, कोणासोबत अशी घटना घडली असल्यास पुढे यावे.

लिफ्ट देण्याच्या बहाण्याने गाडीवर बसवायचा

गेल्या काही दिवसांपासून आरोपी पांढऱ्या रंगाच्या ॲक्टिव्हाने फिरायचा. बेलतरोडी परिसरात पायी जाणाऱ्या महिला आणि मुलींना हेरून लिफ्ट देण्याच्या बहाण्याने मोपेडवर बसवायचा. वृद्ध असल्याने त्याच्यावर कोणाला संशय येत नव्हता. मात्र तो त्यांच्याशी अश्लील चाळे करायचा. याबाबत कोणाला सांगितलं तर ठार मारण्याची धमकी द्यायचा. घाबरलेल्या महिलांनी या संदर्भात पोलीस तक्रार केली नाही. मात्र काही दिवसाआधी एका 16 वर्षीय विद्यार्थिनीशी त्याने अशाच पद्धतीचे अश्लील चाळे केले.

एका विद्यार्थिनीच्या तक्रारीनंतर घटना उघड

विद्यार्थिनीने घडलेला हा प्रकार घरी सांगितला आणि आरोपीचे बिंग फुटले. पालकांनी पोलीस स्टेशनमध्ये या संदर्भात तक्रार दिली. पालकांच्या तक्रारीवरुन गुन्हा दाखल करण्यात आला. मात्र हा अज्ञात व्यक्ती असल्याने पोलिसांना त्याला शोधण्यासाठी मोठी तांत्रिक मदत घ्यावी लागली. अखेर आरोपीला सापळा रचून पोलिसांनी अटक केली आहे.