उल्हासनगर महापालिकेचे सहाय्यक आयुक्त अँटी करप्शनच्या जाळ्यात, लाच घेताना अटक

लाच घेतल्याप्रकरणी उल्हारनगर महापालिकेचे सहाय्यक आयुक्त अजित गोवारींना अटक

Image Credit source: TV9

उल्हासनगर / निनाद करमरकर : उल्हासनगर महापालिकेचे सहाय्यक आयुक्त अजित गोवारी हे अँटी करप्शनच्या जाळ्यात अडकले आहेत. एका बांधकाम ठेकेदाराकडून 20 हजारांची लाच घेताना गोवारी यांच्यासह प्रभाग समितीचा मुकादम आणि कंत्राटी चालक यांना ठाणे अँटी करप्शन विभागाने बेड्या ठोकल्या आहेत. बांधकामाच्या परवानगीसाठी गोवारी यांनी मुकादमाच्या मार्फत ही लाच मागितली होती. याप्रकरणी ठेकेदाराने ठाणे लाचलुचपत विभागाकडे तक्रार दिली. फिर्यादीच्या तक्रारीवरुन ठाणे लाचलुचपचत विभागाने सापळा रचून आरोपींना पडकले

बांधकाम परवानगीसाठी मागितली लाच

उल्हासनगरचे बांधकाम ठेकेदार अनिल करोतिया हे एक बांधकाम करत होते. हे बांधकाम उल्हासनगर महापालिकेने दोन वेळा तोडलं. यानंतर पुन्हा बांधकाम करायचं असेल, तर 50 हजार रुपये लाच द्यावी लागेल, अशी मागणी सहाय्यक आयुक्त अजित गोवारी यांनी मुकादम प्रकाश सकट याच्या माध्यमातून केली.

तडजोडीअंती 20 हजार रुपये देण्याचं ठरलं

तडजोडीअंती 20 हजार रुपये देण्याचं ठरल्यावर सकट याने ही रक्कम स्वीकारून गोवारी यांचा वाहनचालक असलेल्या कंत्राटी चालक प्रदीप उमाप याला दिली. यावेळी अँटी करप्शन विभागाने सकट आणि उमाप या दोघांना बेड्या ठोकल्या. त्यांच्या चौकशीत त्यांनी सहाय्यक आयुक्त अजित गोवारी यांच्यासाठी पैसे घेतल्याचं सांगितल्यानं गोवारी यांच्याविरोधातही गुन्हा दाखल करण्यात आला आहे.

तहसील कार्यालयातील वाहनचालकाला लाच स्वीकारताना अटक

नाशिकच्या त्र्यंबकेश्वर येथील तहसील कार्यालयातील वाहनचालक अनिल आगीवले याला दीड लाखांची लाच स्वीकारताना लाचलुचपत प्रतिबंधक विभागाच्या पथकाने रंगेहाथ पकडले आहे. तक्रारदाराने मौजे शिरसाठे येथील गट क्रमांक 176 मधील शेतजमीन विकत घेण्यासाठी विसारपावती नोटरी केली होती.

शेतजमीन संदर्भात तत्कालीन उपविभागीय अधिकारी इगतपुरी-त्र्यंबकेश्वर येथे वाद चालू होता. या वादाचा निकाल तक्रारदार यांच्या बाजूने करून दिल्याच्या मोबदल्यात वाहनचालक अनिल याने 2 लाख रुपयांची लाच मागितली होती.