Dombivali Crime : उसने घेतलेले पैसे परत केले नाही, संतापलेल्या कर्जदाराचा महिलेवर जीवघेणा हल्ला

उसने पैसे दिले नाही म्हणून महिलेला मारहाण

डोंबिवली / 10 ऑगस्ट 2023 : उसने दिलेले पैसे परत केले नाही म्हणून कर्जदाराने महिलेला जीवघेणी मारहाण केल्याची घटना डोंबिवलीत घडली आहे. या मारहाणीत महिला गंभीर जखमी झाले आहेत. जखमी महिलेला उपचारासाठी रुग्णालयात उपचारासाठी दाखल करण्यात आले आहे. ममताराणी असे पीडित महिलेचे नाव आहे. याप्रकरणी टिळकनगर पोलीस ठाण्यात गुन्हा दाखल करण्यात आला आहे. आरोपी फरार असून, पोलीस त्याचा शोध घेत आहेत. राजीव भुयान असे आरोपीचे नाव आहे. या घटनेमुळे परिसरात एकच खळबळ उडाली आहे. कल्याण-डोंबिवलीत गुन्हेगारी सत्र थांबण्याचे नावच घेताना दिसत नाही. दररोज या ना त्या कारणातून हल्ल्यासारख्या घटना घडत आहेत. यामुळे कायदा आणि सुव्यवस्थेचा प्रश्न निर्माण झाला आहे.

पैसे न मिळाल्याने संतापला आणि महिलेवर हल्ला केला

डोंबिवली पूर्वेतील गोग्रासवाडी परिसरात ममताराणी ही महिला आपल्या कुटुंबासह राहते. महिलेच्या पतीने आरोपी राजीव भुयान याच्याकडून उसने पैसे घेतले होते. हे पैसे मागण्यासाठी राजीव मंगळवारी दुपारी महिलेच्या घरी गेला. मात्र महिलेने पती घरी नाहीत, ते आले की पैसे देऊ असे सांगितले. महिलेच्या बोलण्याचा राग आल्याने आरोपीने महिलेला आधी हाताने मारहाण करण्यास सुरवात केली. यानंतर पिशवीतून हातोडा काढला आणि महिलेच्या डोक्यात घातला. तो एवढ्यावरच थांबला नाही. मग त्याने इंजेक्शनसारखी टोकदार वस्तू महिलेच्या मानेला टोचली. यानंतर आरोपीने तेथून पळ काढला.

पोलिसांकडून आरोपीचा शोध सुरु

या घटनेत महिला गंभीर जखमी झाली. कुटुंबीयांनी तिला उपचारासाठी रुग्णालयात दाखल केले. महिलेच्या फिर्यादीवरुन टिळकनगर पोलिसांनी राजीव विरोधात गुन्हा दाखल केला आहे. पोलीस फरार आरोपीचा शोध घेत आहेत. या घटनेमुळे गुन्हेगारांना कायद्याचा धाक राहिला नसल्याचे पुन्हा एकदा उघड झाले आहे.