Jalgaoan Crime : सख्खा भाऊ पक्का वैरी, घरात पैसे देण्याच्या कारणातून भाऊच भावाच्या जीवावर उठला !
पैशासाठी सख्खा भाऊ पक्का वैरी बनल्याची घटना उघडकीस आली आहे. या घटनेमुळे गावात एकच खळबळ उडाली आहे. पैशासाठी नात्यांचाही विसर पडत आहे.
मुक्ताईनगर / 17 ऑगस्ट 2023 : पैशामुळे काय घडेल हे सांगता येत नाही. पैशासाठी रक्ताची नातीही लोकं विसरतात. रक्ताची नातीच जीवावर उठत आहेत. अशीच एक घटना जळगावमधील मुक्ताईनगरमध्ये उघडकीस आली आहे. घरखर्चाचे पैसे देत नव्हता म्हणून सख्या भावानेच भावाची हत्या केल्याची घटना मुक्ताईनगरमध्ये उघडकीस आली आहे. याप्रकरणी मुक्ताईनगर पोलीस ठाण्यात गुन्हा दाखल करण्यात आला असून, पोलिसांनी आरोपीला अटक केली आहे. मुका माणिक शिंदे असे मयताचे नाव आहे. तर पंढरी माणिक शिंदे असे आरोपीचे नाव आहे. पोलीस पुढील तपास करत आहेत.
काय घडलं नेमकं?
मयत मुका शिंदे हा आपल्या कुटुंबासोबत मुक्ताईनगर तालुक्यातील पूर्णड शिवारातील वस्तीत राहतो. मुका शिंदे आणि पंढरी शिंदे यांच्यात पैशाच्या कारणावरुन वाद झाला. या वादाचे नंतर हाणामारीत रुपांतर झाले. यावेळी पंढरी याने मुका याच्या डोक्यात दगड घातला. यात मुका गंभीर जखमी झाला. त्याला तात्काळ उपचारासाठी रुग्णालयात नेण्यात आले. मात्र उपचारादरम्यान त्याचा मृत्यू झाला.
मतयत मुकाच्या मुलाने दिलेल्या फिर्यादीवरुन पोलिसांनी पंढरीविरोधात हत्येचा गुन्हा दाखल केला आहे. पोलिसांनी आरोपीला अटक केली आहे. मुक्ताईनगर पोलीस पुढील तपास करीत आहेत. या घटनेमुळे गावात एकच खळबळ उडाली आहे.
