क्रूरतेचा कळस ! महिलेने 86 वर्षीय सासूला फ्राईंग पॅनने केली मारहाण, वृद्धेचा झाला दुर्दैवी मृत्यू

Image Credit source: tv9

नवी दिल्ली : दक्षिण दिल्ली पोलिसांनी प्रदीर्घ तपासानंतर एका दुष्ट खुनी सुनेला (Killer Daughter in law)अटक केली आहे. तिने 86 वर्षीय सासूला फ्राईंग पॅनने बेदम मारहाण करून तिचा जीव घेतला (Murder) मात्र आरोपी सुनेने हा खून इतक्या सफाईने केला की पोलिसांना तिच्यापर्यंत पोहोचण्यास 10 दिवस लागले.28 एप्रिल रोजी दिल्ली पोलिसांना दिल्लीच्या नेब सराय भागातून फोन आला. माझ्या मित्राची आई घरात पडली असून खूप रक्तस्त्राव होत असल्याचे त्या व्यक्तीने फोनवर सांगितले. पोलिस घटनास्थळी पोहोचले असता ती महिला मृतावस्थेत आढळली.

हसी सोम असे मृत महिलेचे नाव असून त्या 86 वर्षांच्या होत्या. त्या कोलकाता येथील रहिवासी होत्या आणि दिल्ली येथे सुरजित या त्यांच्या मुलाच्या घरासमोरील एका बेडरूमच्या फ्लॅटमध्ये राहत होता. हसी यांचा चेहरा आणि कवटीवर अनेक जखमांच्या खुणा होत्या.

मृत महिलेचा मुलगा सुरजित सोम यांनी पोलिसांना सांगितले की, त्यांच्या आईला सांधेदुखीचा त्रास होता आणि ऑक्टोबर 2022 मध्ये एकदा ती तिच्या घरातील बाथरूममध्ये पडली होती, ज्यामुळे तिला खूप दुखापत झाली आणि तिला मदतीशिवाय चालता येत नव्हते. यानंतर सुरजित यांनी त्यांच्या घरासमोर एक खोलीचे घर भाड्याने घेतले आणि तेथे त्यांची आई राहू लागली. सुरजीतने ऑक्टोबर 2022 चा फोटोही पोलिसांना दाखवला. यानंतर पोलिसांनी मृतदेह शवविच्छेदनासाठी पाठवला आणि तपासासाठी क्राईम टीमला घटनास्थळी पाचारण केले.

CCTV कॅमेऱ्यात कैद झाली घटना

पोलिसांना घटनास्थळावरून एक टेबल सीसीटीव्ही कॅमेरा देखील सापडला जो बेडरुममध्ये बेडच्या शेजारी टेबलावर ठेवण्यात आला होता परंतु त्याच्यासोबत कोणतेही स्टोरेज डिव्हाइस आढळले नाही. पोलिसांच्या चौकशीत सुरजीतने सांगितले की तो सीसीटीव्ही कॅमेऱ्यातील फुटेज लाइव्ह बघत असे. सुरजीतने पोलिसांना पुढे सांगितले की, अपघाताच्या वेळी सोसायटीचे दिवे बंद झाले होते आणि त्यामुळे कॅमेरा काम करत नव्हता. 29 एप्रिल रोजी पोलिसांना प्राथमिक शवविच्छेदन अहवाल प्राप्त झाला, त्यावरून पोलिसांना समजले की, अंगावर ज्या जखमा झाल्या आहेत, त्या पडल्यामुळे होणे शक्य नाही.

यानंतर पोलिसांनी सविस्तर पोस्टमॉर्टमची वाट पाहिली. यादरम्यान पोलिसांचा तपास सुरू होता. पोलिसांनी सोसायटीतील रक्षक, शेजारी व कुटुंबीयांची चौकशी केली, मात्र पोलिसांना कोणताही सुगावा लागला नाही. मात्र सुरजीतच्या मुलीने पोलिसांना सांगितले की, तिची आई आणि आजीचे नाते चांगले नव्हते. सुरजीतनेही याला दुजोरा दिला. अपघाताच्या दिवशी सुरजीतची पत्नी शर्मिष्ठा घरात एकटीच होती आणि पीडितेच्या घराला बाहेरून कुलूप असून चावी शर्मिष्ठा यांच्या घराकडे असल्याचे पोलिसांना तपासात निष्पन्न झाले.

चौकशीदरम्यान सुरजीतने पोलिसांना सांगितले की, अपघाताच्या दिवशी पोलिसांना फोन करण्यापूर्वी त्याने टेबल सीसीटीव्हीचे मेमरी कार्ड काढले होते. यानंतर पोलिसांनी सीसीटीव्ही फुटेज तपासले. 28 एप्रिल रोजी सकाळी 10.30 वाजता शर्मिष्ठा तिच्या सासूच्या फ्लॅटमध्ये आल्याचे सीसीटीव्ही फुटेजमध्ये दिसून आले. ती हातात फ्राईंग पॅन घेऊन आली होती. ती तिच्या सासूच्या मागे स्वयंपाकघरात गेली, हा भाग सीसीटीव्हीमध्ये दिसला नाही, त्यानंतर सीसीटीव्ही फुटेजमध्ये पीडित महिलेच्या रडण्याचा आवाज ऐकू येत होता आणि त्यासोबतच इतर आवाजही येत होते. त्यानंतर शर्मिष्ठा कपड्याने काहीतरी साफ करताना त्या फुटेजमध्ये दिसले.

मृत महिलेच्या अंगावर आढळल्या 14 जखमा

8 मे रोजी दिल्ली पोलिसांना पोस्टमॉर्टम रिपोर्ट मिळाला ज्यावरून पोलिसांना कळले की पीडितेच्या शरीरावर 14 जखमांच्या खुणा आहेत. मृत्यूचे कारण डोक्याला दुखापत होते. याशिवाय उजव्या हातावर आणि शरीराच्या वरच्या भागावर जखमेच्या खुणाही आढळून आल्या आहेत. पोस्टमॉर्टम रिपोर्ट, सीसीटीव्ही फुटेज आणि लोकांच्या वक्तव्यानंतर दिल्ली पोलिसांनी या प्रकरणी एफआयआर नोंदवून सून शर्मिष्ठाला अटक केली.

सुनेने केली मारहाण

याप्रकरणी पोलीस सध्या अधिक तपास करत आहेत. दिल्ली पोलिसांनी दिलेल्या माहितीनुसार, पूर्वी सुरजीतची आई त्याच्यासोबत राहायची, पण सुरजीतची पत्नी शर्मिष्ठाला तिच्या सासूला वृद्धाश्रमात पाठवायचे होते. पण सुरजीतला त्याच्या आईला सोबत ठेवायचे होते आणि म्हणूनच त्याने नंतर आईसाठी घरासमोर एक खोलीचा फ्लॅट भाड्याने घेतला आणि तिच्यावर नजर ठेवता यावी म्हणून तिथे सीसीटीव्ही बसवले.

पोलिसांनी दिलेल्या माहितीनुसार, घटनेच्या दिवशी सुरजीत त्याच्या काही कामात व्यस्त होता आणि त्यामुळे त्याने वेळेवर फुटेज पाहिले नाही. पोलिसांनी दिलेल्या माहितीनुसार, आतापर्यंतच्या तपासात शर्मिष्ठा यांच्या सुनेचे सासूसोबत जमत नसल्याचे आढळून आले आहे. जबाबदाऱ्यांमुळे शर्मिष्ठाला सासूबाई आवडत नव्हत्या. म्हणून तिने त्यांना बेदम मारहाण केली.