नवी मुंबई : दुबई येथून आलेल्या कंटेनरमधून 363 कोटी रुपयांचे ड्रग्ज (Drugs) नवी मुंबई पोलिसांच्या गुन्हे शाखेने जप्त (Seized) केले आहे. सदर कंटेनर 27 डिसेंबर 2021 रोजी दुबईतून भारतात आला होता. कंटेनरमधील मार्बल्स बाहेर काढून कंटेनरच्या दरवाजाची बारकाईने पाहणी केली. यावेळी दरवाजाच्या फ्रेममध्ये कोणतातरी अंमली पदार्थ लपविला असल्याचा संशय बळावल्याने कंटेनरचा दरवाजा आणि त्यावरील फ्रेम कटर मशिनच्या सहाय्याने कापण्यात आले. त्यामध्ये 72.518 किलो वजनाचे एकूण 168 हेरॉईन (Heroin)चे पॅकेट्स आढळून आले. जप्त करण्यात आलेल्या हेरॉईनची किंमत सुमारे 362.59 कोटी रुपये इतकी आहे.
सदर कंटेनर 27 डिसेंबर 2021 पासून नवी मुंबईतील न्हावाशेवा पोर्ट येथे ठेवण्यात आला होता. या कंटेनरमध्ये मार्बल्स होत्या. मात्र या कंटेनरचा दावा करण्यास अद्याप कुणीही आले नाही. पंजाब पोलिसांच्या स्पेशल ऑपरेशन सेलकडून नवी पोलीस आयुक्तालयाला याबाबत माहिती मिळाली होती. मिळालेल्या माहितीनुसार नवी मुंबईचे पोलीस आयुक्त बिपीनकुमार सिंह यांनी गंभीर दखल घेत पोलीस उपायुक्त सुरेश मेंगडे यांच्या नेतृत्वाखाली आणि अपर पोलीस महेश घुर्ये यांच्या मार्गदर्शनाखाली नवी मुंबई गुन्हे शाखेने सदर कंटेनरचा शोध घेतला. कंटेनरबाबत संशय आल्याने त्याची पंचांसमक्ष पाहणी करण्यात केली असता त्यात हेरॉईन आढळले. याबाबत पनवेल तालुका पोलीस ठाण्यात कलम 8 (क), 22(क), 23(क), 29 अन्वये गुन्हा दाखल करण्यात आला. पुढील तपास गुन्हे शाखा करत आहे. (Drugs worth 363 crores seized by Criminal Investigation Department of Navi Mumbai)