Navi Mumbai Crime : दुकानासमोर रिक्षा पार्क केल्याने दोघांमध्ये वाद झाला, मग भररस्त्यात रक्तरंजित खेळ

क्षुल्लक कारणातून दुकानदाराने रिक्षा चालकाला संपवले

नवी मुंबई / 9 ऑगस्ट 2023 : दुकानासमोर रिक्षा पार्क केल्याच्या क्षुल्लक वादातून नवी मुंबईत रिक्षा चालकाची निर्घृण हत्या केल्याची घटना उघडकीस आली आहे. नवी मुंबईतील तुर्भे येथे ही धक्कादायक घटना घडली. याप्रकरणी पोलिसांनी एका आरोपीला अटक केली आहे. दिनेश चव्हाण असे मयत रिक्षा चालकाचे नाव आहे, तर दिनेश मौर्या असे अटक आरोपीचे नाव आहे. या घटनेमुळे परिसरात तणावाचे वातावरण निर्माण झाला होता. आरोपी आणि मयत एकाच परिसरातील असल्याने कोणताही अनुचित प्रकार घडून नये यासाठी मोठा पोलीस बंदोबस्त तैनात करण्यात आला होता. क्षुल्लक कारणातून हत्या केल्याने पोलीस चक्रावून गेले.

छातीत स्क्रू ड्रायव्हर खुपसून हत्या

नवी मुंबईतीव तुर्भे येथे आरोपी दिनेश मौर्या याचे फर्निचरचे दुकान आहे. या दुकानासमोर मयत दिनेश चव्हाण याने रिक्षा पार्क केली होती. आपल्या दुकानासमोर रिक्षा लावल्याने आरोपीने रिक्षा चालकाला हटकले. यानंतर आरोपी आणि मयत यांच्यात वादावादी झाली. या वादातून आरोपीने पीडिताच्या छातीत स्क्रू ड्रायव्हर खुपसला. यात रिक्षआ चालक गंभीर जखमी झाला. जखणी रिक्षा चालकाला उपचारासाठी रुग्णालयात दाखल करण्यात आले. मात्र डॉक्टरांनी त्याला मृत घोषित केले. याप्रकरणी तुर्भे पोलीस ठाण्यात हत्येचा गुन्हा दाखल करण्यात आला. पोलिसांनी आरोपी दिनेश मौर्या याला अटक केली आहे. पोलीस पुढील तपास करत आहेत. हत्येचे कारण पाहता पोलीसही चक्रावले.