सोलापुरात जिल्हा मध्यवर्ती सहकारी बँकेच्या शाखेवर सशस्त्र दरोडा, सात लाखांची लूट

सोलापूर जिल्हा मध्यवर्ती बँकेच्या शाखेवर दरोडा

सोलापूर : सोलापुरात जिल्हा मध्यवर्ती सहकारी बँकेच्या शाखेवर मध्यरात्री सशस्त्र दरोडा पडला. यामध्ये सात लाख रुपयांची रोकड चोरट्यांनी लंपास केली आहे. गॅस कटरच्या सहाय्याने दरवाजा तोडून चोरट्यांनी बँकेत प्रवेश केला. अज्ञात आरोपींचा शोध सुरु आहे. याआधी, नुकतीच जालन्याच्या अंबड तालुक्यातील शहागड येथे बुलडाणा अर्बन बँकेवर भरदिवसा सशस्त्र दरोडा पडल्याची घटना समोर आली होती.

सोलापूर जिल्ह्यात सांगोल्याजवळ असलेल्या वाकी शिवणे गावातील जिल्हा मध्यवर्ती सहकारी बँकेच्या शाखेवर अज्ञात चोरट्यांनी मध्यरात्रीच्या सुमारास सशस्त्र दरोडा टाकला. यामध्ये सात लाख रुपयांची रोकड चोरट्यांनी लंपास केली. या घटनेनंतर सांगोला तालुक्यात मोठी खळबळ उडाली आहे.

गॅस कटरने दरवाजा तोडून प्रवेश

जिल्हा मध्यवर्ती सहकारी बँकेच्या शाखेत चोरट्यांनी गॅस कटरच्या सहाय्याने दरवाजा तोडून आत प्रवेश केला. बँकेतील लॉकर ही गॅस कटरच्या सहाय्याने कट केले. लॉकरमध्ये ठेवलेली सात लाख रुपयांची रोकड चोरट्याने पळवून नेली. शिवाय बँकेतील महत्त्वाची कागदपत्रं आणि दस्त ऐवजही चोरट्यांनी जाळून टाकले आहेत.

पोलीस घटनास्थळी, चोरांचा शोध सुरु

ही घटना आज सकाळी येथील ग्रामस्थांच्या लक्षात आल्यानंतर याची माहिती सांगोला पोलिसांना देण्यात आली. त्यानंतर सोलापूर जिल्हा पोलीस अधीक्षक तेजस्वी सातपुते, मंगळवेढा उपविभागीय पोलिस अधिकारी राजेश्री पाटील, सांगोला पोलीस ठाण्याचे पोलीस निरीक्षक सुहास जगताप आदींसह पोलिस घटनास्थळी दाखल झाले आहेत. या घटनेनंतर पोलिसांनी चोरट्यांचा शोध सुरु केला आहे.

जालन्यात बँकेवर दरोडा

कालच्याच दिवशी जालना जिल्ह्यातील अंबड तालुक्यातील शहागड येथे बुलडाणा अर्बन बँकेच्या शाखेवर भर दिवसा सशस्त्र दरोडा पडला होता. आरोपींनी रिव्हॉल्व्हरचा धाक दाखवत बँकेतील पैसे आणि लॉकरमधील दागिने लंपास केले आहेत. ही 28 ऑक्टोबर रोजी दुपारी घडली होती. तीन बंदूकधारी आरोपी बँकेत शिरले. त्यांनी बँकेतील कर्मचाऱ्यांना बंदुकीचा धाक दाखवत 25 लाख रुपये आणि मोठ्या प्रमाणावर लॉकरमधील सोने लंपास केले.

संबंधित बातम्या :

जालन्यात बुलडाणा अर्बन बँकेवर सशस्त्र दरोडा, बंदुकीचा धाक दाखवत भर दिवसा बँक लुटली