बहिणीला मारहाण करणाऱ्या भाऊजींशी झटापट, चाकू खुपसून मेहुण्याने जीव घेतला
भाऊजीने आपल्या पत्नीला मारण्यासाठी चाकू आणला होता, मात्र मध्ये पडलेल्या मेव्हण्यावरच तो उगारला. अखेर मेहुण्याने कसाबसा स्वतःचा बचाव केला आणि तोच चाकू भाऊजीला भोसकला.
उल्हासनगर : उल्हासनगरमध्ये मेव्हण्याने आपल्या भाऊजींची म्हणजेच बहिणीच्या पतीची हत्या केल्याची घटना घडली आहे. ठाणे जिल्ह्यातील उल्हासनगरमध्ये कॅम्प 3 भागातील सुभाष नगर परिसरात सोमवारी रात्री उशिरा ही घटना घडली. भाऊजी बहिणीला मारहाण करताना झटापट झाली, अखेर भाऊजींनी उगारलेला चाकू मेहुण्याने त्यांनाच खुपसल्याचा आरोप आहे. (Maharashtra Crime Ulhasnagar Brother in law killed Sister’s Husband)
नेमकं काय घडलं?
मयत सचिन खेडेकर हा पत्नी शुभांगी खेडेकर सोबत उल्हासनगरमधील सुभाष नगर भागात वास्तव्याला होता. सचिन हा व्यसनाधीन असल्याचं बोललं जातं. तो सतत पत्नी शुभांगीला मारहाण करायचा. सोमवारी रात्री सुद्धा त्याने पत्नीला मारहाण करायला सुरुवात केली. यावेळी त्याचा मेव्हणा रोशन जाधव हा वाद सोडवण्यासाठी आला.
मेहुण्यावरच चाकू उगारला
दरम्यान सचिनने आपल्या पत्नीला मारण्यासाठी चाकू आणला होता, मात्र सचिनने तो मेहुणा रोशनवरच उगारला. रोशनने कसाबसा स्वतःचा बचाव केला आणि तोच चाकू सचिनला भोसकला. यात सचिनचा जागीच मृत्यू झाला.
आरोपीला अटक
या हत्येची माहिती मिळताच सहाय्यक पोलीस आयुक्त आणि मध्यवर्ती पोलीस ठाण्याचे वरिष्ठ पोलीस निरीक्षक घटनास्थळी दाखल झाले आणि संबंधित ठिकाणची पाहणी करून पंचनामा केला. सध्या सचिनचा मृतदेह उल्हासनगरच्या मध्यवर्ती रुग्णालयात शव विच्छेदनासाठी पाठवण्यात आला आहे. तर हत्या करणाऱ्या रोशनला पोलिसांनी अटक केली आहे.
मध्य प्रदेशातही मेहुण्याकडून भाऊजींची हत्या
दरम्यान, मेहुण्याने बहिणीच्या पतीची हत्या केल्याचा धक्कादायक प्रकार तीन महिन्यांपूर्वी मध्य प्रदेशातही घडला होता. धक्कादायक म्हणजे भाऊजींचं डोकं उडवून मेहुणा पोलिस स्टेशनात दाखल झाला. आपल्या पतीची हत्या झाल्याचं समजल्यानंतर बहिणीनेही आयुष्य संपवलं. बहिणीने पळून जाऊन केलेलं लग्न मान्य नसल्यानेच त्याने ही हत्या केल्याचा आरोप आहे. मध्य प्रदेशातील जबलपूरमध्ये तिलवारा पोलीस ठाण्याअंतर्गत ही घटना घडली होती.
संबंधित बातम्या :
भाऊजींचं उडवलेलं डोकं घेऊन मेहुणा पोलिस स्टेशनात, बहिणीचीही आत्महत्या
(Maharashtra Crime Ulhasnagar Brother in law killed Sister’s Husband)