Mumbai Crime : बेडरुममधील व्हिडिओ व्हायरल करण्याची धमकी देत पैशांची मागणी, व्यावसायिकाकडे 10 लाख मागितले !
घरातील खाजगी सीसीटीव्ही फुटेजमधून व्हिडिओ बनवून व्यावसायिकाला ब्लॅकमेल केल्याची खळबळजनक घटना उघडकीस आली आहे.
मुंबई / 28 जुलै 2023 : अंधेरीत एक धक्कादायक घटना उघडकीस आली आहे. बेडरुममधील व्हिडिओ व्हायरल करण्याची धमकी देत एका व्यावसायिकाकडे 10 लाखाची मागणी केली. याप्रकरणी आंबोली पोलिसांनी दोन आरोपींना अटक केली आहे. शबिन शाह आणि सुमित गुप्ता अशी अटक आरोपींची नावे आहेत. भारतीय दंड संहितेच्या कलम 379 (चोरी) आणि 384 (खंडणी), 43B आणि 66E अंतर्गत आरोपींना अटक करण्यात आली आहे. आरोपींनी आणखी किती जणांना अशा प्रकारे व्हिडिओ बनवून ब्लॅकमेल केले आहे, किती पैसे लुटले आहेत याबाबत पोलीस अधिक चौकशी करत आहेत.
मुलांवर लक्ष ठेवण्यासाठी लावले होते सीसीटीव्ही
अंधेरी पश्चिम येथील रहिवासी असलेल्या व्यावसायिकाचा इंटरनेट सेवा पुरवण्याचा व्यवसाय आहे. तसेच पीडित एका राजकीय पक्षाचा पदाधिकारीही आहे. व्यावसायिकाने आपल्या घरी मुलांवर लक्ष ठेवण्यासाठी सीसीटीव्ही लावले होते. याच सीसीटीव्हीतील व्यावसायिकाचा बेडरुमधील त्या क्षणांचा व्हिडिओ बनवण्यात आला. त्यानंतर आरोपींनी व्यावसायिकाला तो व्हिडिओ पाठवून व्हायरल करण्याची धमकी देत 10 लाख रुपये मागितले.
आरोपींकडून गुन्ह्याची कबुली
व्यावसायिकाने तात्काळ आंबोली पोलिसात धाव घेत पोलिसांना याबाबत माहिती दिली. पोलिसांनी तात्काळ तपास हाती घेत दोन संशयितांना ताब्यात घेतले. आरोपींची चौकशी केली असता त्यांनी गुन्हा कबूल केला आहे. आरोपींनी खाजगी सीसीटीव्ही फुटेज कसे मिळवले याबाबत पोलीस आरोपींची चौकशी करत आहेत. या गुन्ह्यात आणखी कुणाचा सहभाग आहे का याबाबतही पोलीस तपास करत आहेत.
