‘फ्लॅट खाली करण्यासाठी शारीरिक सुखाची वारंवार मागणी’, डोंबिवलीत भाजप नेत्यावर गंभीर आरोप

भाजप मंडळ अध्यक्ष नंदू जोशी यांच्यावर महिलेचे गंभीर आरोप केले आहेत. नंदू जोशी यांनी सर्व आरोप फेटाळले आहेत.

ठाणे : डोंबिवलीतील मानपाडा पोलीस ठाण्यात भाजप नेते आणि डोंबिवली पूर्व मंडळ अध्यक्ष नंदू जोशी यांच्या विरोधात फ्लॅट खाली करण्यासाठी शारीरिक सुखाची मागणी केल्याचा गुन्हा दाखल करण्यात आलाय. या प्रकरणी “पीडित महिला एका पोलीस अधिकाऱ्याची पत्नी आहे. दोघांमध्ये वाद सुरु आहे. तो अधिकारी माझा मित्र असून पीडित महिला त्याला मदत करत असल्याचा संशय असल्याने तिने माझ्यावर आरोप केला आहे. माझा त्या महिलेशी कोणतेही संबंध नाही”, असं मंडळ अध्यक्ष नंदू जोशी यांनी सांगितलं आहे.

भाजप मंडळ अध्यक्ष नंदू जोशी यांच्या विरोधात मानपाडा पोलीस ठाण्यात विनयभंगाचा गुन्हा दाखल करण्यात आला आहे. एका महिलेने नंदू जोशींवर फ्लॅट खाली करण्यासाठी शारीरिक सुखासाठी धमकी दिल्याचा आरोप केला आहे. महिलेच्या तक्रारीच्या आधारे मानपाडा पोलिसांनी भादवी ३५४ अ, ५०६ प्रमाणे गुन्हा दाखल केला आहे. पोलिसांनी याप्रकरणी पुढील तपास सुरू केला आहे.

‘माझा त्या महिलेशी कुठलाही संबंध नाही’

याबाबत मंडळ अध्यक्ष नंदू जोशी यांना विचारणा केली असता, “पीडित महिला एका पोलीस अधिकाऱ्याची पत्नी आहे. दोघांमध्ये वाद सुरु आहे. तो अधिकारी माझा मित्र असून पीडित महिलेला त्याला मदत करत असल्याचा संशय असल्याने तिने माझ्यावर गुन्हा दाखल केला. मी यापूर्वी कधीही त्या महिलेला पाहिलं नाही. तिला फोनही केला नाही. तिला कुठल्याही प्रकारचा एसएमएस केला नाही. पोलिसांनी या प्रकरणात सखोल चौकशी करावी. माझा त्या महिलेशी कुठलाही संबंध नाही”, असं त्यांनी सांगितलं.

भाजपकडून मानपाडा पोलिसांविरोधात आंदोलनाचा इशारा

या प्रकरणी मानपाडा पोलिसांनी तपास सुरू केलाय. तर दुसरीकडे मानपाडा पोलिसांवरच गंभीर आरोप करण्यात आला आहे. दुसरीकडे गेल्या अनेक दिवसांपासून सर्वच राजकीय पक्षातले कार्यकर्ते मानपाडा पोलीस ठाण्याच्या वर्तणुकीबाबत तक्रारी करत आहेत. भारतीय जनता पक्षाच्या डोंबिवली शहराध्यक्ष नंदू जोशी यांच्यावर खोटा गुन्हा दाखल करून त्यांचं नाव कसं खराब आणि बदनाम होईल, असे कारस्थान मानपाडा पोलीस रचत असल्याचा आरोप करण्यात आला आहे. मानपाडा पोलीस ठाण्याच्या विरोधात उद्या सकाळी सकाळी 11 वाजता मानपाडा पोलीस ठाण्यासमोर निषेध आंदोलन करणार असल्याचा इशारा भाजप कल्याण जिल्हाध्यक्ष शशिकांत कांबळे यांनी दिला आहे.