प्रियकराकडून प्रेयसीवर अत्याचार, मग श्रद्धा वालकरसारखी हत्येची धमकी दिली, मायानगरीत चाललंय काय?
त्या दोघांची काही निमित्ताने बेट झाली. मग भेटीचे रुपांतर प्रेमात झाले. दोघेही एकमेकांसोबत वेळ घालवत होते. मग त्याचे बदललेले रुप पाहून तिला धक्काच बसला.
मुंबई : मुलीशी ओळख निर्माण करत मग तिला प्रेमाच्या जाळ्यात फसवून लैंगिक अत्याचार केल्याची घटना उघडकीस आली आहे. तसेच आपलं म्हणणं न ऐकल्यास श्रद्धा वालकर प्रमाणे तुझीही हत्या करेन अशी धमकीही आरोपीने पीडितेला दिली. अखेर तरुणीने हिंमत करुन मुलुंड पोलिसात धाव घेत सर्व हकीकत सांगितली. पोलिसांनी आरोपीविरोधात कलम 376 (1) (बलात्कार), 376(2) (एन) (एकाच महिलेवर वारंवार बलात्कार करणे), 354 (डी) (दांडा मारणे), 506 (गुन्हेगारी) अन्वये गुन्हा दाखल करण्यात आला आहे. आरोपी फरार असून पोलीस त्याचा शोध घेत आहेत. मुख्तार अहमद अली सय्यद असे आरोपीचे नाव आहे.
ओळखीचे प्रेमात रुपांतर झाले अन्…
तरुणीचा हवाला देत मुलुंड पोलिसांनी सांगितले की, आरोपी मुख्तार अहमद अली सय्यद हा भांडुप येथील रहिवासी असून, त्याची 2020 मध्ये पीडितेशी ओळख झाली. यानंतर फोन आणि मेसेजद्वारे दोघे एकमेकांच्या संपर्कात आले. यानंतर आरोपीने तरुणीला प्रपोज केले. तरुणीने होकार दिल्यानंतर आरोपी तिला वर्सोवा आणि पवईला फिरायला नेले.
धमकी देत वारंवार लैंगिक अत्याचार
यानंतर सय्यदने एकदा तिला भेटण्याच्या बहाण्याने कांजूरमार्ग येथील सनशाईन लॉजवर बोलावले. तिथे त्याने तरुणीवर बलात्कार केला आणि त्यानंतर तिच्या वडिलांना याबाबत माहिती देण्याची धमकी देऊन अनेक वेळा तिच्यावर लैंगिक अत्याचार केला. सततच्या छळाला कंटाळून पीडितेने त्याच्या कॉल किंवा मेसेजला प्रतिसाद देणे बंद केले.
आपल्याला प्रतिसाध देत नाही पाहून 2 जून रोजी सय्यदने तिला धमकी दिली. जर तिने त्याच्याकडे दुर्लक्ष केले तर तिची श्रद्धा वालकरसारखीच अवस्था करेन अशी धमकी त्याने दिली. यानंतर तरुणीने हिंमत दाखवत शुक्रवारी पोलिसांकडे धाव घेतली. तरुणीच्या फिर्यादीवरुन पोलिसांनी सय्यदविरुद्ध गुन्हा दाखल केला आहे.
