चेन्नईतून बालकाचं अपहरण, ट्रेन नागपूरला पोहोचली, रेल्वे पोलिसांच्या तत्परतेमुळे सुखरुप सुटका
नागपूर रेल्वे पोलिसांच्या कंट्रोल रुमला चेन्नई पोलिसांचा फोन आला. तामिळनाडू एक्स्प्रेसने दोन आरोपी चेन्नईतील एका बालकाचे अपहरण करुन जात असल्याचं सांगण्यात आलं. त्यामुळे रेल्वे पोलीस सतर्क झाले
नागपूर : नागपूर रेल्वे पोलिसांच्या सतर्कतेमुळे चेन्नईतून अपहरण करण्यात आलेल्या बालकाची नागपुरात सुटका करण्यात आली. दोन आरोपींना अटक करण्यात आली आहे. नागपूर रेल्वे पोलिसांच्या कामगिरीची स्तुती केली जात आहे.
काय आहे प्रकरण?
नागपूर रेल्वे पोलिसांच्या कंट्रोल रुमला चेन्नई पोलिसांचा फोन आला. तामिळनाडू एक्स्प्रेसने दोन आरोपी चेन्नईतील एका बालकाचे अपहरण करुन जात असल्याचं सांगण्यात आलं. त्यामुळे रेल्वे पोलीस सतर्क झाले आणि त्यांनी ट्रेन नागपुरात येताच माहितीच्या आधारे त्या डब्याकडे कूच केली.
ट्रेनमध्ये दोघांसोबत बालक सापडले
तपासणी सुरु केली असताना दोघा जणांसोबत एक बालक असल्याचं दिसून आलं. त्या दोघांची चौकशी केली असता त्यांच्या कडून समाधानकारक उत्तरं मिळत नव्हती. अखेर पोलिसांनी आपला झटका दाखवतात त्यांनी त्या बालकाला घेऊन जात असल्याचं सांगितलं.
आरोपींची कबुली
मोनू गरीबदास केवट आणि शिब्बू गुड्डू केवट अशी या आरोपींची नावं आहेत. त्यांनी या प्रकरणाची कबुली देत सांगितलं की आम्ही कोणालाही न सांगता या मुलाला घेऊन निघालो. रेल्वे पोलिसांनी दोन्ही आरोपींच्या विरोधात गुन्हा दाखल करून त्यांना अटक केली आणि मुलाला ताब्यात घेऊन शेल्टरमध्ये ठेवलं.
तामिळनाडू पोलीस ताब्यात घेणार
या संदर्भातील माहिती तामिळनाडू पोलिसांना देण्यात आली असून त्यांचं पथक नागपुरात येणार आहे. रेल्वे पोलिसांनी दाखवलेल्या सतर्कतेमुळे एका बालकाला अपहरणापासून वाचवण्यात आले.
नाशकात पोलिसाकडून अपहरण
दरम्यान, पोलिसानेच अल्पवयीन मुलीचे अपहरण केल्याची धक्कादायक घटना उघडकीस आली आहे. फूस लावून अल्पवयीन मुलीचे अपहरण करणाऱ्या पोलिसाला अटक करण्यात आली आहे. नाशिकच्या पंचवटी परिसरात ही घटना घडल्याची माहिती आहे.
कुटुंबीयांशी ओळखीचा पोलिसाकडून गैरफायदा
संशयित पोलीस दीपक जठार हा नाशिकमधील उपनगर पोलीस ठाण्यात कार्यरत आहे. संशयिताच्या विरोधात पॉक्सो अंतर्गत देखील गुन्हा दाखल होण्याची शक्यता आहे. संशयिताने पीडित मुलीच्या घरच्यांशी असलेल्या ओळखीचा फायदा घेत अपहरण केल्याचा आरोप आहे. फूस लावून त्याने तिला पळवून नेल्याचा दावा केला जात आहे. या घटनेमुळे नाशिकच्या पंचवटी परिसरात एकच खळबळ उडाली आहे.
मुंबईत अल्पवयीन मुलीचं अपहरण
दुसरीकडे, बॉलिवूडचा किंग खान अर्थात अभिनेता शाहरुख खान याची भेट करुन देण्याच्या बहाण्याने अल्पवयीन मुलीचं अपहरण केल्याचा प्रकार काही महिन्यांपूर्वी मुंबईत समोर आला होता. या प्रकरणी 43 वर्षीय आरोपीला बेड्या ठोकण्यात रेल्वे पोलिसांना यश आलं होतं. दादर जीआरपीने मोठ्या शिताफीने पीडितेला आरोपीच्या तावडीतून सुखरुप सोडवलं होतं. आरोपीचं नाव सुभान शेख होतं, त्याने फेसबुकवर पीडित तरुणीसोबत ओळख निर्माण केली होती.
आरोपीने फेसबुक अकाऊंटवर 20 वर्षीय तरुणाचे फोटो लावले होते. त्याचबरोबर त्याने आपल्या प्रोफाईलमध्ये मोठमोठ्या कलाकारांसोबतचे फोटोही शेअर केले होते. आरोपीने स्वत:ला इव्हेंट मॅनेजर असल्याचे सांगितले होते. त्याने मुलीला शाहरुख खानला भेटणार का? असं विचारलं असता मुलीने होकार दिला होता.
स्वतःला विशीतील तरुण भासवणाऱ्या 43 वर्षीय आरोपीने मुलीला फेसबुकवर मेसेज केला होता की, कामामध्ये व्यस्त असल्यामुळे तो आपल्या वडिलांना रेल्वे स्टेशनवर तिला घेण्यासाठी पाठवत आहे. मात्र ओळख लपवणारा आरोपी स्वतःच तिला घेण्यासाठी दादर रेल्वे स्टेशनवर पोहोचला. आरोपीने मुलीला भेटल्यानंतर तिच्या मोबाईलचं सीमकार्ड तोडलं. पण रेल्वे पोलिसांनी आरोपीला बरोबर हेरलं. त्यानंतर अल्पवयीन मुलीला त्याच्या तावडीतून सुखरुप सोडवलं आणि आरोपीला अटक केली.
नागपुरात आंघोळीचा व्हिडीओ शूट करत तरुणीचे अपहरण
दरम्यान, तरुणी आंघोळ करत असतानाचा व्हिडीओ चित्रित करुन आधी तो व्हायरल करण्याची धमकी देण्यात आली, त्यानंतर तरुणीचे अपहरण करुन तिच्यावर अत्याचार करण्यात आल्याचा प्रकार नागपुरात उघडकीस आला आहे. धक्कादायक म्हणजे आरोपी हा तरुणीच्या नाते संबंधातील असल्याची माहिती समोर आली आहे.
संबंधित बातम्या :
तरुणी आंघोळ करताना व्हिडीओ शूट, स्क्रीनशॉट व्हायरल, नागपुरात अल्पवयीन शेजाऱ्याचा प्रताप
पत्ता विचारण्याच्या बहाण्याने महिलेशी अश्लील चाळे, इंजिनिअरिंग विद्यार्थ्याला अटक