दरोड्याच्या तयारीत असलेल्या दोघांना बेड्या, नांदेड पोलीसांची कारवाई, पिस्तुल, जिवंत काडतुसं जप्त!
गोपनीय माहितीवरून त्यांनी तरोडा खुर्द परिसरातील खंडोबा चौक भागात शिव रोडवर दरोडा टाकण्याच्या तयारीत असलेल्या दोघांना अटक केली.
नांदेडः नांदेडमध्ये दरोड्याच्या (Nanded Robbery) तयारीत असलेल्या दोघांना पिस्तूलासह पोलिसांनी अटक केली आहे. भाग्यनगर पोलीस ठाण्याच्या हद्दीत हा प्रकार घडला. तरोडा खुर्द भागात पोलिसांनी (Nanded police) ही कारवाई केली. त्यांच्याकडून एक पिस्तुल (Pistol) आणि अंदाजे बारा जिवंत काडतुसं जप्त करण्यात आली. बुधवारी रात्रीच्या सुमारास हा शस्त्रसाठा घेऊन दरोडा टाकण्याच्या तयारीत असलेल्या पाच जणांना पकडण्याचा पोलिसांनी प्रयत्न केला. मात्र यापैकी दोघांना पकडण्यात आलं तर तीघेजण अंधाराचा फायदा घेऊन फरार झाले. या प्रकरणी दोघांसह फरार तीन जणांविरुद्ध दरोडा टाकण्याचा प्रयत्न व इतर कलमान्वये गुन्हा दाखल करण्यात आला आहे. पोलीस या प्रकरणाचा पुढील तपास करत आहेत.
बियाणींच्या हत्येपासून दहशतीचं वातावरण
नांदेडमधील प्रसिद्ध बांधकाम व्यावसायिक संजय बियाणी यांच्या हत्येनंतर शहरात दहशतीचं वातावरण आहे. नागरिकांमधील भीती घालण्यासाठी पोलिसांनी शहरात अवैध अग्निशस्त्र रायफल वापर करून दहशत पसरवण्याचा प्रयत्न करणाऱ्या गुन्हेदारी व्यक्तींना अटक करण्यास सुरुवात केली आहे. यापैकीच एका कारवाईत सदर दोघांना अटक करण्यात आली.
भाग्यनगर पोलीस ठाण्याच्या हद्दीतला प्रकार
पोलीस अधीक्षक प्रमोदकुमार शेवाळे, अतिरिक्त पोलीस अधीक्षक निलेश मोरे, उपविभागीय पोलीस अदिकारी चंद्रसेन देशमुख यांच्या मार्गदर्शनाखाली शहरातील सर्वच ठाणे प्रभारी रात्रीची गस्त मोठ्या प्रमाणात घालत आहेत. गोपनीय माहितीवरून त्यांनी तरोडा खुर्द परिसरातील खंडोबा चौक भागात शिव रोडवर दरोडा टाकण्याच्या तयारीत असलेल्या दोघांना अटक केली. या कारवाईत त्यांनी रवी नारायणसिंग ठाकूर ऊर्फ लाला आणि आनंद यादव या दोघांना ताब्यात घेतले. त्यांच्याकडून एक पिस्तूल, काही जिवंत काडतूस, मोबाइल आणि दुचाकी असा ऐवज जप्त केला गेला.