PNB Scam : मेहुल चोक्सीच्या नाशिकातील मालमत्तांवर टाच; ‘आयकर’ची कारवाई
चोक्सीवर मोठी कारवाई करीत आयकर विभागाने त्याची नाशिक जिल्ह्यातील इगतपुरीतील मुंढेगावात असलेल्या बळवंतनगरमधील 9 एकर 28 गुंठे बेनामी जमीन जप्त केली आहे. ही कोट्यवधी रुपयांची मालमत्ता जप्त करण्याच्या कारवाईने चोकसीसह पीएनबी घोटाळ्यातील इतर आरोपींचे धाबे दणाणले आहेत.
नाशिक : कोट्यवधी रुपयांच्या पंजाब नॅशनल बँक (PNB) घोटाळ्यातील फरार हिरे व्यापारी मेहुल चोक्सी (Mehul Choksi) च्या नाशिकमधील मालमत्तांवर शुक्रवारी आयकर विभागाने जप्ती आणली. चोक्सीची 9 एकर शेतजमीन जप्त करण्यात आली. चोक्सी आणि नीरव मोदी हे पीएनबी घोटाळ्यातील प्रमुख आरोपी जानेवारी 2018 मध्ये देश सोडून परदेशात पळाले होते. चोक्सीवर मोठी कारवाई करीत आयकर विभागाने त्याची नाशिक जिल्ह्यातील इगतपुरीतील मुंढेगावात असलेल्या बळवंतनगरमधील 9 एकर 28 गुंठे बेनामी जमीन जप्त केली आहे. ही कोट्यवधी रुपयांची मालमत्ता जप्त करण्याच्या कारवाईने चोकसीसह पीएनबी घोटाळ्यातील इतर आरोपींचे धाबे दणाणले आहेत. (Income tax action on Mehul Choksis Nashik property in Punjab National Bank scam case)
याआधी ईडीने जप्त केली होती 1217 कोटींची स्थावर मालमत्ता
पीएनबी घोटाळ्याप्रकरणी याआधी ईडीने मेहुल चोक्सी व त्याच्या समुहाच्या एकूण 1217 कोटींची स्थावर मालमत्ता जप्त केली होती. त्यानंतर आता आयकर विभागाने कारवाईचा बडगा उगारला आहे. गीतांजली जेम्स समुहाच्या मेहुल चोक्सीची संपत्ती जप्त केली आहे. तसेच चोक्सीविरोधात रेड कॉर्नर नोटीसही जारी केली आहे. चोक्सीचे मुंबईतील फ्लॅट्स, कोलकात्यामधील मॉल आणि हैदराबादमधील ज्वेलरी पार्क आयकर विभाग व ईडीने ताब्यात घेतले असून त्यात मुंबईतील 15 फ्लॅट, 17 कार्यालयांचा समावेश आहे. तसेच आंध्रप्रदेश, हैदराबादमध्ये जेम्स एसईजी, कोलकातामधील शॉपिंग मॉल, अलिबागमधील फार्म हाऊस, तामिळनाडूमधील 231 एकर जमिनीचा समावेश आहे.
आयकर विभागाने प्रोहिबिशन ऑफ बेनामी प्रॉपर्टी ट्रॅन्जेक्शन अॅक्ट अंतर्गत मेसर्स नाशिक मल्टी सर्व्हिसेस एसइझेड लिमिटेड आणि मेसर्स गीतांजली जेम्स लि.ची मालमत्ता जप्त केली आहे. बळवंतनंगर मुंढेगाव, ता. इगतपुरी, जि. नाशिक, येथील जमिन पूर्णपणे केंद्र सरकारच्या सर्व भारमुक्त निहीत असतील. अशा जप्तीच्या संदर्भात कोणतीही भरपाई देय असणार नाही, असे आयकर विभागाने म्हटले आहे.
केंद्र सरकारने राज्यसभेत दिली होती कारवाईची माहिती
गेल्या महिन्याच्या सुरुवातीला केंद्र सरकारने राज्यसभेत कारवाईची माहिती दिली. आर्थिक गुन्हेगार विजय मल्ल्या, नीरव मोदी आणि मेहुल चोक्सीच्या मालकीची 19,111.20 कोटी रुपयांची मालमत्ता जप्त करण्यात आली आहे, असे केंद्र सरकारतर्फे राज्यसभेत सांगण्यात आले होते. चोक्सी भारतातून पळून गेल्यानंतर जून 2018 मध्ये मुंबईच्या न्यायालयाने त्याच्याविरुद्ध अजामीनपात्र वॉरंट जारी केले. चोक्सीने 2018 मध्ये अँटिग्वाचे नागरिकत्व घेतले. तेव्हापासून तो अँटिग्वा आणि बारबुडा येथे राहतो. चोक्सी 23 मे 2021 रोजी अँटिग्वा येथून बेपत्ता झाला आणि दुसऱ्याच दिवशी डॉमिनिकामध्ये बेकायदेशीरपणे प्रवेश केल्याबद्दल त्याला अटक करण्यात आली. (Income tax action on Mehul Choksis Nashik property in Punjab National Bank scam case)
इतर बातम्या
VIDEO : नालासोपाऱ्यात तरुणाला बेदम मारहाण; मारहाणीचा सर्व प्रकार सीसीटीव्हीमध्ये कैद