Nashik | महिला वैद्यकीय अधिकारी कारमध्ये जळून खाक; कोळसा झालेली सापडली हाडे, घातपात की अपघात?
डॉ. सुवर्णा वाजे-जाधव या गेल्या तीन दिवसांपासून बेपत्ता होत्या. त्यामुळे त्यांच्या कुटुंबाने पोलिसांत तक्रार नोंदवली होती. तेव्हा मंगळवारी रात्री मिल्ट्री गेटसमोर त्यांची गाडी जळालेल्या अवस्थेत सापडली.
नाशिकः नाशिक (Nashik) महापालिकेच्या (Municipal Corporation) वैद्यकीय अधिकारी (Medical officer) डॉ. सुवर्णा वाजे-जाधव यांचा कारमध्ये जळून मृत्यू झाल्याचे समोर येत आहे. वाजे या मोरवाडी रुग्णालयात कार्यरत होत्या. त्यांचा नाशिकमधील वाडीवऱ्हे परिसरातील एका वाहनात मृतदेह सापडला आहे. याची माहिती परिसरातील नागरिकांनी पोलिसांना दिली. त्यानंतर पोलीस आणि महापालिकेचे अधिकारी सध्या घटनास्थळावर दाखल झाले आहेत. नेमका हा प्रकार कशाचा आहे, घातपात की आणखी काही, याचा तपास पोलिसांनी सुरू केला आहे. मात्र, या घटनेने महापालिकेचे अधिकारी आणि कर्मचाऱ्यांमध्ये एकच खळबळ उडाली आहे.
तीन दिवसांपासून बेपत्ता…
डॉ. सुवर्णा वाजे-जाधव या गेल्या तीन दिवसांपासून बेपत्ता होत्या. त्यामुळे त्यांच्या कुटुंबाने पोलिसांत तक्रार नोंदवली होती. तेव्हा मंगळवारी रात्री मिल्ट्री गेटसमोर त्यांची गाडी जळालेल्या अवस्थेत सापडली. त्यात जळून कोळसा झालेली हाडे होती. ही हाडे सुद्धा त्यांची असल्याची समजते. वाडीवऱ्हे पोलिसांनी या घटनेला दुजोरा दिला आहे. त्यांनी अधिक तपास सुरू केला आहे. घटनास्थळावर पोलीस आणि महापालिकेचे अधिकारी दाखल झाले आहेत. त्यांनी तपास कार्य सुरू केले आहे. मात्र, अचानक एका अधिकाऱ्याचा मृतदेह जळालेल्या अवस्थेत सापडतो काय, याबद्दल तर्कवितर्क आणि चर्चांना उधाण आले आहे.
कर्मचाऱ्यांमध्ये भीती
नाशिकमध्ये आज सगळीकडे प्रजासत्ताक दिनाचा उत्साह आहे. महापालिकेतही हा उत्साह होता. सारे ध्वजारोहण समारंभात व्यस्त होते. मात्र, काही वेळातच महापालिकेच्या महिला वैद्यकीय अधिकारी सुवर्णा वाझे-जाधव यांचा मृतदेह आढळल्याची बातमी येऊन धडकली आणि साऱ्यांनाच धक्का बसला. त्यामुळे अनेक अधिकारी आणि कर्मचाऱ्यांनी तातडीने घटनास्थळी धाव घेतली. आता पोलिसांनी तातडीने तपास सुरू केला आहे. नाशिकमध्ये भयंकर वेगाने गुन्हेगारी वाढली आहे. गेल्या काही दिवसांत तरी एकाच आठवड्यात तीन खून झालेले नाशिककरांनी पाहिले. मात्र, आता चक्क एका महिला अधिकाऱ्याचा मृतदेह सापडल्याने भीतीची वातावरण आहे. पोलिसांनी याप्रकरणाचा लवकरात लवकर तपास करावा. हा घातपाताचा प्रकार आहे की, आणखी काही याचा शोध घ्यावा, असा सूर महापालिका कर्मचाऱ्यांमधून निघत आहे.
Nashik MHADA | म्हाडा भूखंडात कोट्यवधींचा घोटाळा; मंत्री आव्हाडांचा सलग 2 ट्वीटमधून बॉम्बगोळा!
Nashik | ऑनलाईन शिक्षणाने मारले, 11 वीच्या विद्यार्थिनीची आत्महत्या; 2 महिन्यांतली तिसरी घटना
