धुमधडाक्यात लग्न, घरात आनंदाचं वातावरण होतं, अचानक लाईट गेली अन्…

तरुणीची फसवणूक करणाऱ्या तरुणाला भरमांडवातून पोलिसांनी ताब्यात घेतले

मैनपुरी : उत्तर प्रदेशात एक काळीज पिळवटून टाकणारी घटना उघडकीस आली आहे. जिल्ह्यातील नागला कंस गावात वीजेचा शॉक लागल्याने नवविवाहित तरुणाचा मृत्यू झाला. विशेष म्हणजे दोन दिवसांपूर्वी तरुणाचे लग्न झाले होते. नवरा-नवरीच्या अंगावरील हळद उतरली नव्हती, अन् लग्नघरात शोकाकुल वातावरण पसरले आहे. पतीच्या निधनामुळे नववधूवर दु:खाचा डोंगर कोसळला आहे. सोनू सिंग असे मयत तरुणाचे नाव असून, तो बीएचा विद्यार्थी होता. मयत सोनू आणि आरती यांचा 11 मे रोजी मोठ्या थाटामाटात विवाह झाला होता. सध्या पोलीस या प्रकरणाचा तपास करत आहेत.

11 मे रोजी थाटामाटात विवाह पार पडला

मैनपुरीच्या नागला कंस गावातील सोनू सिंग याचा नागला सडा गावातील आरतीसोबत 11 मे रोजी थाटामाटात विवाह सोहळा पार पडला. सोनू सासरकडच्या मंडळींचा निरोप घेत नववधूला घरी घेऊन आला. नववधूचे उत्साहात घरी स्वागत झाले. घरी पै-पाहुणे जमले होते. विवाहानंतरचे रीतिरिवाज सुरु होते. यामुळे घरामध्ये अगदी उत्साहाचे वातावरण होते.

वीजेचा धक्का लागल्याने मृत्यू

अचानक घरातील वीज गेली. सध्या उकाड्याचे दिवस असल्याने सर्व पाहुणे गरमीने हैराण झाले होते. यामुळे सोनू इन्व्हर्टरची तार लावायला गेला. यावेळी त्याला वीजेचा जोरदार झटका बसला आणि तो बेशुद्धावस्थेत जमिनीवर कोसळला. नातेवाईकांनी त्याला तात्काळ रुग्णालयात नेला, मात्र डॉक्टरांनी त्याला मृत घोषित केले.

कुटुंबीयांवर दुःखाचा डोंगर

सोनूच्या मृत्यूची बातमी समजताच कुटुंबीयांवर दुःखाचा डोंगर कोसळला आहे. वधूच्या हातावरील मेंदी पुसण्याआधीच ती विधवा झाली. शवविच्छेदन केल्यानंतर मृतदेह कुटुंबीयांच्या ताब्यात देण्यात आला. तरुणावर शोकाकुल वातावरणात अंत्यसंस्कार करण्यात आले. सोनूच्या मृत्यूमुळे संपूर्ण गावावर शोककळा पसरली आहे.