Pune Crime : पुण्यात कथित कोयता गँगचे सत्र सुरूच, जुन्या वादातून वृद्ध जोडप्याला हल्ला

पुण्यात जुन्या वादातून कोयता गँगकडून जेष्ठ नागरिकावर हल्ला

पुणे : पुणे शहरामध्ये कोयता टोळीची दहशत प्रचंड वाढल्याचे आणखी एका घटनेतून समोर आले आहे. मागील काही दिवसांपासून हैदोस घालणार्‍या या टोळीने एका ज्येष्ठ नागरिकाला टार्गेट केल्याने परिसरात प्रचंड खळबळ उडाली आहे. संबंधित जेष्ठ नागरिक एका मोकळ्या मैदानावर आपला कुटुंबीयांसोबत झोपला होता. त्याचदरम्यान कोयता टोळीने तेथे येऊन कुटुंबीयांवर प्राणघातक हल्ला केला. या हल्ल्यात तक्रारदार ज्येष्ठ नागरिक जखमी झाला असून, तातडीच्या उपचारासाठी जवळच्या रुग्णालयात नेण्यात आले. या घटनेने ज्येष्ठ नागरिकांच्या सुरक्षेचा प्रश्नही ऐरणीवर आला आहे. पोलिसांनी कोयता टोळीला रोखण्यासाठी कठोर पावले उचलली असून सर्व आरोपींना लवकरच जेरबंद करू, असा विश्वास वरिष्ठ पोलीस अधिकाऱ्यांनी व्यक्त केला आहे.

जुन्या भांडणाचा राग मनात धरून हल्ला

ज्येष्ठ नागरिकावर केलेला हल्ला हा पूर्ववैमनस्यातून करण्यात आल्याचे उघड झाले आहे. कोयता टोळीतील तरुणांनी जुन्या भांडणाचा राग मनात धरून तक्रारदार सतिश भीमा काळे यांच्यावर कोयत्याने वार केल्याची माहिती समोर आली आहे.

पुण्याच्या शिवाजीनगर भागातील एका मोकळ्या मैदानावर हा धक्कादायक प्रकार घडल्याने परिसरात प्रचंड खळखळ उडाली आहे. सतिश काळे आणि त्यांच्या पत्नी झोपेत असताना कोयता टोळीने त्यांच्यावर हल्ला केला.

सतिश काळे यांचे काही तरुणांसोबत चार महिन्यापूर्वी किरकोळ कारणातून बाचाबाची झाली होती. या भांडणाचा राग मनात धरत चौघांनी मिळून काल रात्री हल्ला केला. याप्रकरणी दाद्या बगाडे, दिपू शर्मा, तुषार काकडे आणि मोन्या कुचेकर या चौघांविरोधात शिवाजीनगर पोलीस ठाण्यात गुन्हा दाखल करण्यात आला आहे.

परिसरात रात्रभर प्रचंड दहशत

शिवाजीनगर परिसरातील मोकळ्या मैदानावर झोपलेल्या ज्येष्ठ नागरिक दांपत्यावर कोयता टोळीने हल्ला केल्याची बातमी वाऱ्यासारखी पसरली. त्यानंतर संपूर्ण रात्रभर कोयता टोळीची प्रचंड दहशत निर्माण झाली.

मिळालेल्या माहितीनुसार, फिर्यादी सतीश भीमा काळे हे आपल्या पत्नी आणि मुलाबाळासह शिवाजीनगर भागात असलेल्या एका मैदानावर रात्री झोपले होते. याच दरम्यान हातात कोयते घेऊन आलेल्या चौघा हल्लेखोरांनी ज्येष्ठ नागरिक दांपत्यावर प्राणघातक हल्ला केला.

परिसर निर्जन तसेच शांत झाल्याचे पाहून हल्लेखोर कोयता टोळीने झोपेत राहिलेल्या दांपत्यावर हल्ला करण्याची संधी साधली. हल्ल्यानंतर आरोपी हल्लेखोर पसार झाले असून त्यांचा शोध घेण्यासाठी पोलीस पथके विशेष मेहनत घेत आहेत.