ना डॉक्टर ना कुठली पदवी तरीही शरीरयष्टीसाठी इंजेक्शनचा डोस, पिंपरीत चौघांना अटक
मेफेन्टरमाइन सल्फेट हे इंजेक्शन हृद्यदाब वाढवण्यासाठी केला जातो. एमडी आणि एमबीबीएस पदवी असलेल्या डॉक्टरांच्या प्रिस्क्रिप्शन शिवाय या इंजेक्शनची विक्री करता येत नाही.
पुणे : मेफेन्टरमाइन सल्फेट (Mephentermine Sulfate) या इंजेक्शनची बेकायदा विक्री करणाऱ्या चौघा जणांना पुण्यात अटक करण्यात आली आहे. बिबवेवाडी पोलिसांनी चार जणांना जेरबंद केलं. त्याच्याकडून या इंजेक्शनच्या 211 बाटल्या आणि एक स्विफ्ट कार असा एकूण 2 लाख 6 हजार 548 रुपयांच्या मुद्देमाल जप्त करण्यात आला.
काय आहे प्रकरण?
परेश रेणूसे, प्रविणसिंग भाटी, अक्षय वांजले, शौनक संकपाळ अशी अटक करण्यात आलेल्या चौघा आरोपींची नावे आहेत. रेणूसे हा जिम ट्रेनर म्हणून काम करतो. मेफेन्टरमाइन सल्फेट हे इंजेक्शन हृद्यदाब वाढवण्यासाठी केला जातो. एमडी आणि एमबीबीएस पदवी असलेल्या डॉक्टरांच्या प्रिस्क्रिप्शन शिवाय या इंजेक्शनची विक्री करता येत नाही. असं असतानाही हे चौघे जण जिममध्ये येणाऱ्या तरुणांना शरीरयष्टी वाढवण्यासाठी या इंजेक्शनची बेकायदा विक्री करत होते.
नागपुरात रेमडेसिव्हीरचा इंजेक्शनचा काळाबाजार
दुसरीकडे, रेमडेसिव्हीरचा इंजेक्शनचा काळाबाजार (Remdesivir Injection Black Market) करणाऱ्या दोघा जणांना नागपूर जिल्हा सत्र न्यायालयाने पाच वर्षे कारावासाची शिक्षा सुनावली आहे. शुभम अर्जुनवार, ज्योती उर्फ जिया उत्तमसिंग अजित असे शिक्षा झालेल्या आरोपींची नावं आहेत. कोरोनाच्या दुसऱ्या लाटेत काळाबाजार करताना दोघांना अटक करण्यात आली होती.
कोरोनाच्या दुसऱ्या लाटेत त्यांनी रेमडेसिव्हीर इंजेक्शनचे ब्लॅकमार्केट केल्याचा आरोप झाला होता. हा प्रकार 18 एप्रिल 2012 रोजी सायंकाळी 5 वाजताच्या सुमारास वाथोडा परिसरात घडला होता. 25 हजार रुपयांमध्ये रेमडेसिव्हीर इंजेक्शन विकत असताना त्यांच्याकडून 5 इंजेक्शन जप्त करण्यात आली होती. आजपर्यंत रेमडेसिव्हीर काळाबाजार प्रकरणात ही तिसरी केस असून चार आरोपींना कारावासाची शिक्षा सुनावण्यात आली आहे.
नागपुरात वॉर्डबॉयला 3 वर्ष सश्रम कारावासाची शिक्षा
याआधी, नागपुरातील वॉर्डबॉयला 3 वर्ष सश्रम कारावासाची शिक्षा ठोठावण्यात आली होती. एप्रिल 2021 मध्ये कोरोनाग्रस्त रुग्णाचे रेमडेसिव्हीर इंजेक्शन चोरून विकल्याचा आरोप त्याच्यावर झाला होता. महेंद्र रतनलाल रंगारी असे 28 वर्षीय वॉर्डबॉयचे नाव आहे. तो नागपूरच्या रंगारी चौकातील एका कोव्हिड सेंटरमध्ये कामाला होता. महेंद्र रेमडेसीव्हीर इंजेक्शनचा काळाबाजार करत होता. 17 एप्रिल 2021 रोजी हुडकेश्वर पोलिसांनी महेंद्रवर गुन्हा नोंदवला होता. उच्च न्यायालयाने या प्रकरणाला गांभीर्याने घेऊन फास्ट ट्रॅक कोर्टात प्रकरण चालवण्याचे आदेश दिले होते. याचा तपास तीन महिन्यांत पूर्ण होऊन निकाल लागला. या प्रकरणी मुख्य न्यायदंडाधिकारी एस. बी. पवार यांच्या समक्ष सुनावणी झाली होती.
संबंधित बातम्या :
रेमडेसिव्हीर काळाबाजार प्रकरणी 5 वर्षांचा कारावास, महाराष्ट्रातील कोर्टाचा सुपरफास्ट निकाल
रेमडेसिव्हीर काळा बाजार, सापळा रचून पकडलेल्या सहा आरोपींची निर्दोष मुक्तता