Pune Accident : रग्णवाहिका आणि दुचाकीची समोरासमोर जोरदार धडक, दोघा तरुणांचा जागीच मृत्यू

भीषण अपघात...

Image Credit source: TV9 Marathi

पुणे : पुणे नाशिक महामार्गावर भीषण अपघात (Pune Accident news) झाला. या अपघातात दोघा तरुणांचा जीव गेला आहे. रुग्णवाहिका आणि बाईक यांच्या जोरदार धडक झाली. समोरसमोरच झालेल्या भीषण धडकेत दोघा तरुणाचा जागच्या (2 young boys died in Bike ambulance Accident) जागी मृत्यू झाला. त्यामुळे हळहळ व्यक्त केली जाते. पुणे नाशिक महामार्गावरील राजगुरुनगर (Rajguru Nagar Accident) जवळ हा भीषण अपघात झाला. गेल्या 24 तासांत झालेल्या दोन अपघातामध्ये चार तरुणांनी जीव गमावला आहे. कोल्हापूरमध्ये शुक्रवारी रात्री झालेल्या अपघातातही दोघा बाईकस्वार तरुणांचा मृ्त्यू झाला होता. ही घटना ताजी असतानाच पुणे-नाशिक हायवेवरही भीषण अपघातात आता आणखी दोघा तरुणांनी जीव गमावलाय.

समोरासमोर जोरदार धडक

राजगुरुनगर शहरादवळ पुणे-नाशिक महामार्गावर शासकीय विश्रामगृहाजवळ हा अपघात घडला. या अपघातात मृत्यू झालेल्या दोन्ही तरुणांचं वय अवघं 23 वर्ष होतं. आतिश नंदकिशोर सोमवंशी आणि मयूर अशोक पवळे अशी अपघातातील मृत तरुणांची नावं आहेत. आतिश आणि मयूर हे दोघेही दुचाकीवर होते. त्यावेळी दुचाकी आणि रुग्णवाहिकेची समोरासमोर जोरदार धडक झाली. या धडकेत जबर जखमी झालेल्या दोघा तरुणांचा जागीच जीव गेला.

रुग्णवाहिकेने फरफटत नेलं

पोलिसांनी दिलेल्या माहितीनुसार, ॲम्बुलन्स नाशिकहून बाजूने पुण्याच्या दिशेने चालली होती. समोरून आलेल्या दुचाकीची रुग्णवाहीकेला चालकाच्या बाजूने जोरदार धडक बसली. पण त्यात काही फूट अंतर दुचाकी ओढत गेली. यामध्ये दुचाकीवर असलेल्या दोन युवकांचा रस्त्यावर पडून गंभीररित्या जखम झाली. जबर मार बसल्याने दोन्हीही दुचाकीस्वार तरुणांचा जागीच मृत्यू झालाय.

या अपघातानंतर खुद्द रुग्णवाहिकेचे चालक महेश चंद्रकांत बालकोळी यांनी खेड पोलिसांना अपघाताची माहिती दिली. त्यानंतर खेड पोलीस घटनास्थळी दाखल झाले आणि त्यांनी अपघाताची संपूर्ण चौकशी केली. सध्या या अपघाताची नोंद करण्यात आली असून पुढील तपास पोलिसांकडून केला जातोय.

पुणे-नाशिक महामार्गावर दिवसेंदिवस अपघातांची संख्या वाढतेय. मानवी चुकांमुळे व वाहतुकीचे नियम न पाळल्याने बहुतांश अपघात होत असल्याचं दिसून येतंय. वाढत्या अपघातात कोवळ्या वयातच तरुणांना जीव गमवावा लागत असल्यानं हळहळ व्यक्त केली जातेय. तर पुणे नाशिक या राष्ट्रीय महामार्गावरील राजगुरुनगरचे काम संथ गतीने सुरू असल्याने अपघात वाढले असल्याचंही बोललं जातंय.