नगरमध्ये मध्यरात्री सशस्त्र दरोडा, दरोडेखोरांना प्रतिकार करताना शेतकरीच…
नगरमध्ये सशस्त्र दरोड्याची घटना सोमवारी रात्री घडली. दरोडेखोरांची चाहूल लागताच शेतकऱ्याने त्यांच्याशी दोन हात करण्याचा प्रयत्न केला, मात्र तो निष्फळ ठरला.
अहमदनगर / कुणाल जयकर : श्रीगोंदे तालुक्यातील बेळवंडी पोलीस ठाण्याच्या हद्दीत अरणगाव दुमाला येथे सोमवारी मध्यरात्री सशस्त्र दरोड्याची घटना घडली. यावेळी दरोडेखोरांचा प्रतिकार करताना मारहाणीत शेतकऱ्याचा मृत्यू झाल्याने एकच खळबळ माजली आहे. या घटनेने परिसरात दहशत पसरली असून, भीतीचे वातावरण आहे. दरोडेखोरांनी सोन्याच्या दागिन्यांसह काही कागदपत्रे लंपास केली. कल्याण गायकवाड असे मयत शेतकऱ्याचे नाव आहे. याप्रकरणी बेळवंडी पोलीस ठाण्यात गुन्हा दाखल करण्यात आला असून, दरोडेखोरांना शोधण्यासाठी पोलीस पथक रवाना झाले आहे.
अरणदुमला येथे मध्यरात्री दरवाज्याला धक्का देऊन दरवाजा तोडून दरोडेखोर आतमध्ये शिरले. दरवाज्याच्या आवाजाने गायकवाड यांना जाग आली. त्यांनी दरोडेखोरांचा डाव हाणून पाडण्याचा संपूर्ण प्रयत्न केला. मात्र यात त्यांना यश आले नाही. अखेर दरोडेखोरांनी केलेल्या मारहाणीत त्यांचा मृत्यू झाला.
जाड केबलने मारहाण केल्याने शेतकऱ्याचा मृत्यू
बेलवंडी पोलीस स्टेशन अंतर्गत येणाऱ्या आरणगाव शिवारामध्ये रात्री 12 वाजण्याच्या सुमारास कल्याण गायकवाड यांच्या घरी चार अज्ञात दरोडेखोर घुसले. सोन्याचे दागिने तसेच पाच हजार रुपये घेऊन पोबारा केला. यावेळी चोरट्यांना प्रतिकार करणाऱ्या कल्याण गायकवाड यांना जाड केबलने चोरट्यांनी मारहाण केली. यात उपचाराआधीच त्यांचा मृत्यू झाला.
या घटनेची माहिती कळताच अहमदनगर जिल्ह्याचे अपर पोलीस अधीक्षक प्रशांत खैरे यांच्यासह स्थानिक पोलिसांनी तातडीने धाव घेतली. चोरट्यांचा शोध घेण्यासाठी नाकाबंदी केली होती, मात्र चोरटे पळून जाण्यात यशस्वी झाले आहेत. या घटनेमुळे आरणगाव परिसरात चांगलीच खळबळ उडाली आहे.
