अंधेरीत डान्स बारवर छापा; समाजसेवा शाखेच्या धडक कारवाईत 17 महिलांची सुटका

मुंबई : मायानगरी म्हणून ओळखल्या जाणाऱ्या मुंबईत पुन्हा एकदा डान्स बार छुप्या पद्धतीने चालवले जात असल्याचे उघडकीस आले आहे. विशेषतः पश्चिम उपनगरात अशा बेकायदा कृत्यांना मोठ्या प्रमाणावर ऊत आला आहे. मुंबई पोलिसांच्या समाजसेवा शाखेने अंधेरीत कारवाई करून डान्स बारचा छुपा बाजार उठवला. अंधेरी पूर्वेकडील परिसरात असलेल्या डान्स बारवर छापा टाकण्यात आला. या कारवाईत डान्स बारच्या मॅनेजरसह 18 जणांना अटक करण्यात आली. तसेच डान्स बारमधून एकूण 17 महिलांची सुटका केली गेली. समाजसेवा शाखेने ही कारवाई केल्यानंतर पुढील तपासासाठी हे प्रकरण अंधेरी पोलिसांकडे सोपवण्यात आले आहे.

गुप्त माहितीच्या आधारे पोलिसांनी टाकला छापा

अंधेरी परिसरात डान्स बार चालवला जात असल्याची गोपनीय माहिती पोलिसांना मिळाली होती. त्या माहितीच्या आधारे सोमवारी रात्री समाजसेवा शाखेचे पथक त्या बारवर पोचले. कारवाईबाबत कमालीची गुप्तता बाळगण्यात आली होती. बार चालकाला कुठलीही कुणकुण लागू नये म्हणून नागरिकांच्या वेशातील पोलिसांनी श्रुती बारमध्ये शिताफीने प्रवेश करीत छापा टाकला. या कारवाईत बार चालकाकडून तब्बल 1.20 लाख रुपयांची रोख रक्कम, लॅपटॉप, स्पीकर, अॅम्प्लीफायर आणि मेमरी कार्ड जप्त करण्यात आले.

डान्स बार कर्मचाऱ्यांसह आठ ग्राहकांना अटक

पोलिसांच्या पथकाने डान्स बारवर कार्यरत रोखपाल, व्यवस्थापक, सात वेटर, एक ऑर्केस्ट्रा कलाकार आणि आठ ग्राहकांना अटक केली आहे. त्याचबरोबर बारच्या परिसरातून 17 पीडित महिलांची सुटका करण्यात पोलीस पथकाने यश मिळवले आहे. हॉटेल्स, रेस्टॉरंट्स आणि बार रूम्सशी संबंधित अश्लील डान्स प्रतिबंधक कायदा आणि महिलांच्या प्रतिष्ठेचे संरक्षण करणाऱ्या 2016 मधील कायद्यांतर्गत कलमांखाली गुन्हा दाखल करण्यात आला आहे.