वरमाला घालताच नवरदेव खाली कोसळला, तो पुन्हा उठलाच नाही; काय घडले नेमके?
डीजेच्या आवाजामुळे अस्वस्थ वाटू लागल्याने मंडपातच नवरदेव बेशुद्ध होऊन त्याचा मृत्यू झाल्याची घटना बिहारमधील सीतमढी येथे घडली आहे. या घटनेमुळे दोन्ही कुटुंबावर शोककळा पसरली आहे.
सीतामढी : लग्नात डीजे आवाजाने अस्वस्थ वाटून नवरदेवाचा मृत्यू झाल्याची धक्कादायक घटना बिहारमधील सीतामढी येथे उघडकीस आली आहे. सुरेंद्र कुमार असे मयत नवरदेवाचे नाव आहे. वरमाला घातल्यानंतर फोटोशूट सुरु असतानाच नवरदेवाला अस्वस्थ वाटू लागले. यानंतर तो जमिनीवर कोसळून बेशुद्ध झाला. त्याला तात्काळ रुग्णालयात नेण्यात आले, मात्र तत्पूर्वीच त्याचा मृत्यू झाला होता. या घटनेमुळे दोन्ही कुटुंबावर दुःखाचा डोंगर कोसळला आहे.
फोटोसेशन सुरु असताना अस्वस्थ वाटू लागले
इंदरवा गावात राहणाऱ्या तरुणीचा धनहा पंचायतीतील मनिथर येथील तरुणासोबत विवाह होणार होता. नवरदेव वरात घेऊन वधूकडे आला. वरातीचे स्वागत केल्यानंतर नवरा-नवरी स्टेटजवर आले. यानंतर नवरीने नवऱ्याची आरती करत एकेमकांना वरमाला घातली. यानंतर फोटोसेशन सुरु झाले. यादरम्यान जोरजोरात डीजे सुरु होता.
काही वेळात तो बेशुद्ध झाला
डीजे आवाजामुळे नवरदेवाला अस्वस्थ वाटत होते. तो वारंवार ते बंद करण्यासाठी सांगत होता. आवाजामुळे त्याला अधिक अस्वस्थ वाटू लागले आणि काही वेळात तो बेशुद्ध झाला. लोकांनी त्याला उठवण्याचा खूप प्रयत्न केला, मात्र तो काहीच प्रतिसाद देत नसल्याने त्याला रुग्णालयात दाखल करण्यात आले. डॉक्टरांनी त्याला तपासून सीतामढी येथे रेफर केले. मात्र रुग्णालयात पोहचण्याआधीच सुरेंद्रचा मृत्यू झाला. यानंतर दोन्ही कुटुंबावर शोककळा पसरली आहे.
