ताटात रस्सा सांडल्याचा वाद, कटर घेतलं आणि थेट रक्तच सांडलं! कोल्हापुरातील खळबळजनक हत्याकांड
आज उपचारादरम्यान जखमी ओंकार माने याचा मृत्यू झाला आहे. त्यामुळे औरवाड येथे तणावाचे वातावरण निर्माण झाले असून कडक पोलिस बंदोबस्त ठेवण्यात आला आहे.
कोल्हापूर : जेवताना झालेल्या भांडणातून दोघांवर कटरने (Cutter) हल्ला झाल्याची घटना कुरुंदवाड जवळ घडली होती. ही घटना येथील समाधान हॉटेलमध्ये घडली होती. त्यावेळी सांगली, मिरज शासकीय रुग्णालयात (Sangli, Miraj Government Hospital) जखमींवर उपचार सुरू होते. तर अमीनमहम्मद रफिक पटेल (वय 21), ओंकार माने असे जखमी झाले होते. तर कुरुंदवाड पोलीसांत तिघा विरोधात गुन्हा दाखल झाला करण्यात आला होता. मात्र आज सांगली, मिरज शासकीय रुग्णालयात उपचार (treatment) सुरू असताना ओंकार माने याचा मृत्यू झाला आहे. त्यामुळे औरवाड येथे तणावाचे वातावरण निर्माण झाले असून कडक पोलिस बंदोबस्त ठेवण्यात आला आहे.
302 नुसार गुन्हा दाखल
दरम्यान संशयित आरोपी कुरुंदवाड इथले ओंकार शिकलगार, प्रकाश शिकलगार तर शेडशाळ येथील कुलदीप संतपाल या तिघांवर आता कलम 302 नुसार गुन्हा दाखल करण्यात येणार असल्याचे कुरंदवाड पोलिसांनी सांगितले आहे.
ताटाला धक्का लागला आणि रस्सा ताटात सांडला
याबाबत पोलिसांकडून मिळालेली माहिती अशी की, येथील समाधान हॉटेलमध्ये मंगळवारी रात्री औरवाड इथले अमीनमहंमद रफिक पटेल, ओंकार माने गेले होते. त्यावेळी तेथे संशयित आरोपी ओंकार शिकलगार, प्रकाश शिकलगार (दोघे रा. कुरुंदवाड) तर कुलदीप संतपाल (शेडशाळ) हे जेवायला बसले होते. यावेळी ओंकार शिकलगार याच्या ताटाला ओंकार माने कडून धक्का लागला आणि रस्सा ताटात सांडला. त्यावेळी माने याला ओंकार शिकलगार याने धक्का का मारलास असे विचारत धक्काबुकी केली. त्यावेळी पटेल, माने आणि ओंकार शिकलगार यांच्यात वाद सुरू झाला.
उपचारादरम्यान जखमी ओंकार माने याचा मृत्यू
यादरम्यान शिकलगार याने खिशातील कटर काढत दोघांना जिवंत सोडणार नाही असे म्हणत, कटर अमीनंमहंमद पटेल, ओंकार माने यांच्या पोटावर वार करून जखमी केले होते. तर आरोपी प्रकाश शिकलगार याने पाण्याच्या स्टीलच्या जगणं मारहाण केली. तसेच वाईट शिवीगाळ देखील केली. तर संशयित आरोपी कुलदीप संतपाल याने शिवीगाळ करत लाथबुक्याने मारहाण केली. यामुळे दोघेही गंभीर जखमी झाले. याबाबत स्वतः जखमी अमीनमहंमद पटेल यांनी मिरज दवाखान्यात वर्दी जबाब दिल्यावरून कुरुंदवाड पोलिसात गुन्हा दाखल करण्यात आला होता. दरम्यान आज उपचारादरम्यान जखमी ओंकार माने याचा मृत्यू झाला आहे. त्यामुळे औरवाड येथे तणावाचे वातावरण निर्माण झाले असून कडक पोलिस बंदोबस्त ठेवण्यात आला आहे.
