बाईकचा बाईकला धक्का लागला, मग भररस्त्यात जे घडलं त्याने पालघर हादरलं !

नालासोपारा : क्षुल्लक वादातून भररसत्यात 20 वर्षीय तरुणाची हत्या केल्याची धक्कादायक घटना पालघर जिल्ह्यातील नालासोपारा येथे घडली. बाईकला धक्का लागला म्हणून दोघांनी मिळून 20 वर्षीय तरुणाला बेदम मारहाण करत त्याची हत्या केली. या घटनेमुळे परिसरात खळबळ माजली. याप्रकरणी नालासोपारा पोलीस ठाण्यात गुन्हा दाखल करण्यात आला आहे. नालासोपारा पोलिसांनी तीन आरोपींना अटक केली आहे. रविवारी सायंकाळी 4 वाजण्याच्या सुमारास ही घटना घडली. रोहित यादव असे मयत तरुणाचे नाव आहे. तरुण मुलाच्या मृत्यूमुळे यादव कुटुंबीयांवर दुःखाचा डोंगर कोसळला आहे.

बाईकचा धक्का लागला म्हणून मारहाण

रोहित यादव हा रविवारी सायंकाळी आपल्या मित्रासोबत बाईकवरुन चालला होता. याचदरम्यान दुसऱ्या बाईकवरुन तिघे जण समोरुन येत होते. यावेळी रोहितच्या बाईकचा आरोपींच्या बाईकच्या आरशाला धक्का लागला. यानंतर आरोपींनी रोहितला थांबवले. मग धक्का लागल्याचा जाब विचारत रोहित आणि त्याच्या मित्राला मारहाण करण्यास सुरवात केली. यात रोहितचा मृत्यू झाला.

तिन्ही आरोपींना अटक

घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेत शवविच्छेदनासाठी रुग्णालयात पाठवला. तसेच तिघा आरोपींविरोधात कलम 302 अन्वये गुन्हा दाखल करण्यात आला आहे. पोलिसांनी तिन्ही आरोपींना अटक केली आहे. या घटनेनुळे नालासोपारा परिसरात खळबळ उडाली आहे.

पालघर जिल्ह्यात गुन्हेगारी वाढतच चालली आहे. दररोज काही ना काही गुन्हेगारी घटनांमुळे पालघर जिल्हा चर्चेत असतो. ही गुन्हेगारी रोखण्याचे मोठे आव्हान पोलिसांसमोर उभे आहे. क्षुल्लक कारणातून होणाऱ्या हत्याकांडामुळे नागरिकांमध्ये भीतीचे वातावरण आहे.