आधी नवऱ्याला दारू पाजली, नंतर त्याचाच काटा काढला, तिने असं का केलं ?

दापोली क्राईम

लग्न झालेलं असतानाही दुसऱ्या इसमावर प्रेम होतं आणि त्याच प्रेम संबंधांमध्ये अडसर ठरतो, म्हणून महिलेने स्वत:च्याच हाताने कपाळाचं कुंकू पुसलं आणि नवऱ्याचा काटा काढला. दापोलीमध्ये भयानक हत्याकांड घडलं असून अनैतिक संबंधातून निर्घृण कृत्य करणारी आरोपी महिला आणि तिच्या प्रियकराला दापोली पोलिसांनी ताब्यात घेतलं आहे. नेहा बक्कर आणि मंगेश चिंचघरकर अशी आरोपींची नावे असून त्यांनी आपला गुन्हा कबूल केला आहे . तर निलेश बक्कर असे मृत इसमाचे नाव आहे.या घटनेने दापोलीमध्ये प्रचंड मोठी खळबळ उडाली आहे.

याबाबत मिळालेल्या माहितीनुसार, मृत निलेश बाक्कर यांचा रत्नागिरी जिल्ह्यातील दापोली गिम्हवणे गावात सलूनचा व्यवसाय होता. मात्र ते सोमवारी अचानक बेपत्ता झाले, त्यानंतर त्यांच्या भावाने दापोली पोलीस स्थानकात जाऊन आपला भाऊ बेपत्ता झाल्याची तक्रार नोंदवली. त्यानुसार दापोली पोलिसांनी तपास करताना पोलिसांनी बेपत्ता निलेश यांच्या पत्नीकडे, नेहाकडेही चौकशी केली, मात्र तिच्या सांगण्यात तफावत आढळून आली. त्यामुळे संशय आल्याने पोलिसांनी नेहा ज्या हॉटेलमध्ये काम करत होती, त्या हॉटेलचे सीसीटीव्ही फुटेज तपासले. तेव्हा नेहा आणि तिचा पती हे दोघे हॉटेलमधून एकत्र बाहेर पडत असल्याचे दिसून आले, त्यामुळे पोलिसांता संशय आणखीनच बळावला. तसेच नेहा हिने एका बिअर शॉपमधून बिअर घेतल्याचे सुद्धा सीसीटीव्ही मध्ये दिसून आले.

अखेर पोलिसांनी नेहाला ताब्यात घेऊन तिची कठोरपणे चौकशी केली असता तिने तिचा गुन्हा कबूल केला. प्रेमसंबंधांमध्ये अडसर ठरणाऱ्या पतीचा आपल्याच प्रियकराच्या मदतीने काटा काढल्याचे तिने सांगितलं. आपल्याच नवऱ्याला प्रियकराच्या मदतीने दारू पाजली आणि त्याचा खून केला, त्यानंतर तो मृतदेह विहिरीत फेकला असं तिने कबूल केलं. पोलिसांनी नेहाचा प्रियकर संशयित आरोपी मंगेशलाही अटक केली आहे. तो बस चालक आहे. मंडणगड डेपोची बस दापोलीला वस्तीला घेऊन आला असता त्याला दापोली पोलिसांनी सापळा रचून पकडले . तर निलेश याचा मृततेह विहीरीतून काढून दापोली रुग्णालयात पोस्टमॉर्टमसाठी आणण्यात आला. या भयानक हत्याकांडाने दापोलीवासीय प्रचंड घाबरले असून गावात खळबळीचे वातावरण आहे.