बालकांबाबत आक्षेपार्ह फिल्म पाहणे महागात पडेल, एनसीबीआरच्या रडारवर सोशल मीडिया
मुलांविरोधातील गुन्हेगारीला आळा घालण्यासाठी इंटरनेटवरील आक्षेपार्ह कंटेंट हटवणे याकडे एनसीबीआरने प्रामुख्याने लक्ष दिले आहे. याच अनुषंगाने एनसीबीआरने राजस्थानातील तरुणाच्या संशयास्पद घडामोडींवर बारीक लक्ष ठेवले होते.
बाडमेर : गुगल किंवा सोशल मीडियाच्या इतर प्लॅटफॉर्मवर लहान मुलांचे आक्षेपार्ह व्हिडिओ पाहणे आता महागात पडणार आहे. जे लोक मोबाईलवर अशाप्रकारे व्हिडिओ सर्च करतात, त्यांची तुरुंगात रवानगी होऊ शकते. पोलिसांनी हे प्रकार रोखण्यासाठी सोशल मीडियावर करडी नजर रोखली आहे. या विशेष मोहिमेंतर्गत राजस्थानमध्ये एका तरुणाला अटक करण्यात आली आहे. नॅशनल क्राईम रेकॉर्ड ब्युरोने (एनसीबीआर) केलेल्या तक्रारीवरून ही कारवाई केली आहे. गुगल आणि सोशल मीडियामध्ये मुलांचे आक्षेपार्ह व्हिडिओ डाउनलोड करुन पाहणाऱ्या तरुणाला ताब्यात घेण्यात आले आहे. एनसीबीआरच्या विशेष मोहिमेमुळे गुन्हेगारांचे धाबे दणाणले आहेत.
एनसीबीआरने एटीएसला लिहिले पत्र
अलीकडच्या काळात लहान मुलांविरोधातील गुन्ह्यांचे प्रमाण वाढले आहे. यामागे इंटरनेटचा देखील अतिरेकी वापर होत असल्याचे उघड झाले आहे. सोशल मीडियाच्या विश्वात लहान मुलांचे देखील अश्लील व्हिडिओ बनवले जातात. हे व्हिडिओ मोठ्या प्रमाणावर व्हायरलसुद्धा होत आहे. याचा लहान मुलांवर गंभीर परिणाम होऊ लागला आहे.
मुलांविरोधातील गुन्हेगारीला आळा घालण्यासाठी इंटरनेटवरील अश्लील कंटेंट हटवणे याकडे एनसीबीआरने प्रामुख्याने लक्ष दिले आहे. याच अनुषंगाने एनसीबीआरने राजस्थानातील तरुणाच्या संशयास्पद घडामोडींवर बारीक लक्ष ठेवले होते.
आरोपी लहान मुलांचे आक्षेपार्ह व्हिडिओ करत होता व्हायरल
आरोपी तरुणाने लहान मुलांचे मोठ्या प्रमाणावर आक्षेपार्ह व्हिडिओ डाऊनलोड करून ते व्हायरल करण्याचे काम सुरू ठेवले होते. यासंदर्भात सबळ पुरावे हाती लागल्यानंतर एनसीबीआरने कारवाईसाठी दहशतवाद विरोधी पथकाला पत्र लिहिले होते. या दोन्ही तपास यंत्रणांनी संयुक्तरीत्या गुन्ह्याचा अधिक तपास करून आरोपीच्या हातात बेड्या ठोकल्या.
एनसीबीआर आणि एटीएसची संयुक्त कारवाई
भवरलाल असे आरोपी युवकाचे नाव असून तो बाडनेरच्या इंदिरा कॉलनीतील रहिवासी आहे. एनसीबीआर आणि एटीएसकडून सूचना मिळाल्यानंतर कोतवाली पोलिसांनी आरोपीचा थांगपत्ता लावून त्याला अटक करण्यात यश मिळवले.
भवरलाल हा गुगल आणि सोशल मीडियामध्ये लहान मुलांचे अश्लील व्हिडिओ पाहायचा. हे कृत्य एक प्रकारचे गुन्हाच आहे, असे जाहीर करत पोलिसांनी भवरलाल विरोधात कारवाई केली आहे.
आरोपी विरोधात भादंवि कलम तसेच माहिती तंत्रज्ञान कायद्याच्या विविध कलमांतर्गत गुन्हे दाखल करण्यात आले आहेत. या गुन्ह्याचा अधिक तपास सुरू असून भवरलालचे अन्य साथीदार आहेत का? याचाही शोध घेतला जात आहे.
