Goa Election Exit Poll Result 2022: स्पष्ट बहुमत कुणालाच नाही! मग सत्ता कुणाची? छोटे पक्ष ठरवणार
Goa Election Exit Poll Result 2022:
मुंबई : देशाच्या पाच राज्यांच्या निवडणुकांचे एक्झिट पोल (5 State Assembly EXIT Poll) समोर आल्यानंतर महाराष्ट्रासह अनेकांची नजर छोट्याशा गोव्यावर लागली होती. उत्पल पर्रीकराना तिकीट न देण्यापासून ते अनेक बंडखोरांची आव्हानं थोपवण्याचा प्रश्न भाजपला गोव्यात सोडवावा लागला होता. अखेर आता मतदान पूर्ण झाल्यानं गोव्याचे (Goa Assembly Election) एक्झिट पोल समोर आले आहेत. या एक्झिट पोलच्या अंदाजांनुसार गोव्यात कोणत्याच पक्षाला बहुमत मिळण्याची शक्यता नसल्याचं समोर आलं आहे. मात्र सर्वाधिक जागा या सत्ताधारी भाजपलाच (Bharatiya Janata Party) मिळण्याची शक्यता वर्तवण्यात आली आहे. दरम्यान, काँग्रेस दुसऱ्या नंबरचा पक्ष असेल, तर आपनंही गोव्यात उल्लेखनीय कामगिरी केली होती. त्या पार्श्वभूमीवर आपचा किमान चार जागी विजय होऊ शकतो, असाही अंदाज वर्तवण्यात आला आहे.
एक्झिट पोलच्या अंदाजांनुसार, गोवा विधानसभेतील एकूण 40 जागांपैकी भाजपला 17 ते 19 जागा मिळतील, असा अंदाज वर्तवण्यात आला आहे. तर काँग्रेस आणि मित्रपक्षांना 11 ते 13 जागा मिळण्याची शक्यता आहे. दरम्यान, आप गोवा विधानसभेत आपलं खातं उघडण्याचा अंदाजही वर्तवण्यात आला आहे. आपचे 1 ते 4 उमेदवार निवडून येऊ शकतात, अशी शक्यता आहे.
पाहा व्हिडीओ –
दुसरीकडे गोव्यात अपक्षांसह इतर छोटे पक्ष महत्त्वाची भूमिका बजावण्यासोबतच किंगमेकर ठरण्याचीही शक्यता नाकारता येत नाही. टीएमसी आणि मगोनं गोव्यात युती केली आहे. तर दुसरकडे आता गोवा फॉरवर्डच्या किती जागा निवडून येतात हेही पाहणं महत्त्वाचंय. गोव्यात आप, काँग्रेस आघाडी आणि भाजप वगळता इतरांना दोन ते सात जागा मिळू शकतात अशी शक्यता आहे.
सध्याचं गोव्याचं बलाबल काय आहे?
गोवा विधानसभेच्या एकूण जागा 40 जागा आहेत. सध्या गोव्यात भाजपचे 17 आमदार असून काँग्रेसचे 13 आमदार आहेत. तर मगोपचे 3 आणि गोवा फॉरवर्डचे 3 आमदार होते. मात्र अनेक आमदारांनी निवडणूक निकालांच्या पार्श्वभूमीवर राजीनामे देत उमेदवारीसाठी आणि निवडणूक लढवण्यासाठी आपल्या आमदारकीचा राजीनामा देत पक्षांतर केलं होतं. तर अनेक उमेदवार ही अपक्षही निवडणुकीला सामोरे गेले आहेत.
भाजपचं 2022मध्ये 22 जागांचं ध्येय!
2022च्या विधानसभा निवडणुकांमध्ये 22 जागा जिंकण्याचे ध्येय भाजपनं ठेवलं होतं. डॉ. प्रमोद सावंत यांच्या नेतृत्त्वाखाली भाजपनं 2022ची निवडणूक लढवली आहे. गोवा विधानसभेची निवडणूक ही संपूर्ण देशात उत्पल पर्रीकर यांना भाजपनं उमेदवारी न दिल्यामुळे चर्चेत आली होती. दरम्यान, भाजपसमोर बंडखोर उमेदवारांचंही आव्हान होतं. या सगळ्या परिस्थितीही गोव्यात भाजपच मोठा पक्ष असेल, असा अंदाज एक्झिट पोलवरुन समोर आला आहे.
मात्र बहुमतापेक्षा कमी जागा असल्यानं आता गोव्यातील राजकीय समीकरणं नेमकी काय तयार होतात हे पाहणं महत्त्वाचं ठरणार आहे. 10 मार्चला गोवा विधानसभा निवडणूक निकालासह इतर पाच राज्यांचाही निकाल जाहीर होणार आहे. 14 फेब्रुवारी रोजी गोवा विधानसभेच्या सर्व चाळीसही जागांचं एकाच टप्प्यात मतदान पार पडलं होतं.
संबंधित बातम्या :
Goa Election Exit Poll Result 2022 : गोव्यातील हाय व्होल्टेज मतदारसंघात कोण बाजी मारणार? जाणून …
Exit Poll Results 2022 LIVE : उत्तर प्रदेश गोव्यात भाजप, पंजाबमध्ये आपची सत्ता येण्याची शक्यता
