Sharmishtha Raut | ‘बिग बॉस मराठी’ फेम अभिनेत्री शर्मिष्ठा राऊतचा साखरपुडा

मुंबई : ‘बिग बॉस मराठी’ या रिअ‍ॅलिटी शोमुळे घराघरात पोहोचलेली अभिनेत्री शर्मिष्ठा राऊत लग्नाच्या बोहल्यावर चढणार आहे. तेजस देसाईसोबत साखरपुडा झाल्याची माहिती शर्मिष्ठाने सोशल मीडियावर दिली आहे. (Bigg Boss Marathi Actress Sharmishtha Raut Engagement)

शर्मिष्ठाचा साखरपुडा एप्रिल महिन्यात होणार होता, मात्र लॉकडाऊनमुळे तो पुढे ढकलला गेला. काही नियम शिथिल झाल्याने नाशिकमध्ये कुटुंबीय आणि जवळच्या मित्रांच्या उपस्थितीत तिने साखरपुडा केला. इगतपुरीच्या रिसोर्टमध्ये हा समारंभ झाला.

शर्मिष्ठाने एक छान पोस्ट लिहित आपली प्रेमकहाणी सांगितली आहे. ‘पराभवाच्या नाही, तर आयुष्यात प्रत्येक क्षणी अलगद मिठीत घेणारा, कायम मी आहे याची पावला पावलाला जाणीव देणारा, माझा तो, माझा स्वप्नातला राजकुमार मला भेटलाय” असं तिने यामध्ये लिहिलं आहे. विशेष म्हणजे तेजसनेही आपल्या भावना अशाच पद्धतीने शब्दबद्ध केल्या आहेत.

अभिनेत्री शर्मिष्ठा राऊत सध्या ‘सुखांच्या सरींनी हे मन बावरे’ या मालिकेत ‘संयोगिता’ची भूमिका साकारात आहे. याआधी तिने ‘मन उधाण वाऱ्याचे’, ‘उंच माझा झोका’ अशा मालिका केल्या आहेत. ‘आज काय स्पेशल’ या कुकरी शोचे सूत्रसंचालनही ती करत होती, मात्र तिला खरी ओळख मिळाली. ‘बिग बॉस मराठी’मुळे. पहिल्या पर्वात ‘वाईल्ड कार्ड’ एन्ट्री घेणाऱ्या शर्मिष्ठा राऊतने थेट फायनलपर्यंत मजल मारली होती.