वजन कमी करायचं? केटो डाएट फॉलो करा, जाणून घ्या
तुम्हाला वजन कमी करायचं आहे का? असं असेल तर ही बातमी खास तुमच्यासाठीच आहे. वजन कमी करण्यासाठी अनेक डाएट ट्रेंडमध्ये आहेत. त्यापैकी एक म्हणजे केटो आहार (Keto Diet), कार्बोहायड्रेट्स खूप कमी असणाऱ्या आहाराचा यात समावेश केला जातो, याविषयी जाणून घेऊया.
वजन कमी करायचं आहे का? मग चिंता कसली. आम्ही यावर आज उपाय सांगणार आहोत. वजन कमी करण्यासाठी तुम्ही केटो डाएट फॉलो करू शकता. या केटो डाएटमध्ये (Keto Diet) 65 ते 70 टक्के चांगले फॅट्स, 20 ते 25 टक्के प्रथिने आणि फक्त 5 टक्के कार्बोहायड्रेट अशा प्रमाणात पदार्थ घेतले जातात. याविषयी सविस्तर जाणून घ्या.
वाढत्या वजनामुळे आवडीचे कपडे घालता न येणे, जाड दिसणे, अशा कारणांमुळे काही लोकांचा आत्मविश्वास खूपच कमी होतो. याशिवाय वाढलेले वजन आजारही सोबत आणते. वजन कमी करण्यासाठी अनेक जण केटो डाएट (Keto Diet) करतात. हे केटो डाएट नेमकं काय करतं, याविषयी खाली जाणून घ्या.
कार्ब ऊर्जा देण्याचे काम करतात, परंतु ते केटोमध्ये कमी होते आणि त्याऐवजी शरीराला चरबीपासून (फॅट) ऊर्जा मिळते, म्हणून अशा गोष्टींचा आहारात समावेश करावा जेणेकरून शरीराला चरबीसह (फॅट) चांगल्या प्रमाणात पोषक द्रव्ये मिळतील.
तुम्हाला केटो डाएट (Keto Diet) फॉलो करायचा असेल, पण शाकाहारी असाल तर जाणून घ्या तुम्ही तुमच्या आहारातून कोणते पदार्थ घेवू शकता. यामुळे कार्बचे प्रमाणही कमी होईल आणि शरीराला प्रथिने, चरबी तसेच इतर पोषक द्रव्ये मिळू शकतील.
‘हे’ तेल वापरा
केटो आहारात शरीराला चरबीची (फॅट) आवश्यकता असते, म्हणून स्वयंपाकासाठी ऑलिव्ह ऑइल, एवोकॅडो तेल, आणि नारळ तेल वापरावे. हे तेल फार जड नसते आणि पोषक तत्वांनी समृद्ध असल्यामुळे आरोग्यासाठी फायदेशीर मानले जाते.
प्रथिनांसाठी ‘हे’ शाकाहारी पदार्थ घ्या
शरीरातील प्रथिनांची कमतरता पूर्ण करण्यासाठी केटो आहार फॉलो करणाऱ्या लोकांसाठी दुग्धजन्य पदार्थांचा आहारात समावेश केला पाहिजे. यामध्ये ग्रीक दही, हेवी क्रीम, चीज, दही, स्ट्रिंग चीज, परमेसन चीज आदींचा आहारात समावेश करता येतो.
‘या’ फॅट आणि प्रोटीनच्या गोष्टी खा
केटो आहारादरम्यान निरोगी चरबी आणि प्रथिनांसाठी हेजल नट, बदाम, अक्रोड, मॅकाडामिया नट, पेकन नट्स इत्यादींचा आहारात समावेश करावा. याशिवाय काही फ्लॅक्स सीड्स, चिया सीड्स, सूर्यफूल बियाणे इत्यादींचाही आहारात समावेश करता येतो. यामुळे शरीराला व्हिटॅमिन ईपासून अनेक पोषक द्रव्ये चांगल्या प्रमाणात मिळतील.
‘ही’ फळे खा
केटो आहार फॉलो करत असाल तर रोजच्या दिनक्रमात एवोकॅडो, ब्लूबेरी, स्ट्रॉबेरी, रास्पबेरी आणि लिंबू सारखी फळे खाऊ शकतात. यात कमी कार्ब असतात आणि व्हिटॅमिन सी जास्त असतात. बऱ्याच पोषक घटकांचा चांगला स्रोत यात आहे.
‘या’ भाज्या खा
तुम्ही वजन कमी करण्यासाठी केटो डाएट फॉलो करत असाल तर आपल्या आहारात फ्लॉवर, लेट्यूस, पालक, मशरूम, कांदा, शिमला मिरची, कोबी इत्यादी भाज्या ठेवा.