1971 च्या युध्दाचा फोटो शेअर करत तालिबानने दिली पाकिस्तानला धमकी, काय म्हणाला तालिबान?

भारत पाकिस्तान युध्द

Image Credit source: Social Media

मुंबई, तालिबानचा नेता अहमद यासिर (Ahmad Yasir) याने 1971 मधील भारत-पाकिस्तान युद्धाचा फोटो (India Pak 1971 war Photo) शेअर करून पाकिस्तानला इशारा दिला आहे. अहमद यासिरने 1971 मध्ये पाकिस्तानने भारताला शरणागती पत्करल्याचे चित्र शेअर करत इस्लामाबादची खिल्ली उडवली आहे. तालिबानचा नेता अहमद यासिर यानेही पाकिस्तानला बदनामी टाळण्यासाठी अफगाणिस्तानपासून दूर राहण्याचा इशारा दिला. तालिबानने हा फोटो शेअर करण्यामागचे कारण म्हणजे पाकिस्तानने अफगाणिस्तानला युद्धाची धमकी दिली आहे आणि अफगाणिस्तानने भारताचे उदाहरण देत हा फोटो शेअर केला आहे.

पाकिस्तानच्या मंत्र्यांच्या वक्तव्याने उडाली खळबळ

अफगाणिस्तानमधील तहरीक-ए-तालिबान पाकिस्तान (TTP) च्या तळांना लक्ष्य करण्याचे पाकिस्तानचे गृहमंत्री राणा सनाउल्लाह यांचे धमकीचे विधान चर्चेत आहे. मंत्री राणा सनाउल्लाह यांनी एका पाकिस्तानी वृत्तवाहिनीला दिलेल्या मुलाखतीत तालिबानला युध्दाची धमकी दिली होती.

तालिबानचे पाकिस्तानला उत्तर

तालिबानने पाकिस्तानला प्रत्युत्तर देत असे म्हटले आहे की, “अफगाणिस्तान हा नेहमीच त्याच्या राष्ट्रीय आणि प्रादेशिक सुरक्षा आणि स्वातंत्र्याचे रक्षण करण्यास सक्षम आहे.” निवेदनात म्हटले आहे की, “अफगाणिस्तानवरील कोणत्याही आक्रमणाला चोख प्रत्युत्तर दिले जाईल. आम्ही कोणत्याही हल्ल्याला प्रत्युत्तर देण्यासाठी पूर्णपणे तयार आहोत.”

परराष्ट्र मंत्री बिलावल यांनी दिले कारवाईचे संकेत

त्याचवेळी पाकिस्तानचे परराष्ट्र मंत्री बिलावल भुट्टो यांनीही अफगाणिस्तान सरकार टीटीपीला लगाम घालण्यात अपयशी ठरल्यास दहशतवाद्यांविरोधात थेट कारवाई करण्याचे संकेत दिले.

अफगाणिस्तानच्या विधानालाही महत्त्व आहे कारण ते अशा वेळी आले आहे जेव्हा पाकिस्तानचे सर्वोच्च नागरी आणि लष्करी अधिकारी दहशतवादाच्या वेगाने पसरणाऱ्या लाटेला तोंड देण्यासाठी सोमवारी झालेल्या सर्व-महत्त्वाच्या राष्ट्रीय सुरक्षा समितीच्या (NSC) बैठकीच्या दुसऱ्या फेरीत सहभागी झाले होते.